Çin Latın Amerikası ölkələrinə 9 milyard dollarlıq yeni kredit xətti açır
Bakı, 13 may, AZƏRTAC
Çinin Sədri Si Cinpin çərşənbə axşamı günü Latın Amerikası və Karib hövzəsində ölkəsinin mövcudluğunu 9 milyard dollarlıq yeni kredit xətti və əlavə infrastruktur sərmayələri ilə genişləndirməyə söz verib.
AZƏRTAC xəbər verir ki, Si Cinpin Pekində üç ildən bir keçirilən Çin-CELAC Forumu çərçivəsində nazirlərin görüşünə toplaşan 30-a yaxın ölkədən olan nümayəndələrə bildirib ki, dünyanın ikinci ən böyük iqtisadiyyatı Latın Amerikası və Karib Hövzəsi Dövlətləri Birliyinin (CELAC) üzvlərinə 9,18 milyard dollar kredit verəcək.
Çinin lideri deyib: “Çin, Latın Amerikası və Karib hövzəsi Qlobal Cənubun mühüm üzvləridir. Müstəqillik bizim şanlı ənənəmizdir, inkişaf və dirçəliş bizim təbii haqqımızdır, haqq və ədalət isə ümumi arzumuzdur”.
“Reuters” agentliyi xəbər verir ki, Si Cinpin Latın Amerikası liderlərinə söz verib: Pekin özü də bu regiondan idxalı artıracaq və Çin şirkətlərini daha çox investisiya qoymağa təşviq edəcək.
Analitiklər deyirlər ki, yuanla ifadə olunan yeni kredit xətti bir çox region paytaxtlarında müsbət qarşılanacaq, baxmayaraq ki, maliyyələşmə dollarla ifadə olunmuş borclara xidmət göstərmək üçün mübarizə aparan ölkələrə dərhal fayda verməyəcək.
Si Cinpin, həmçinin beş ölkə üçün vizasız rejimin tətbiq olunduğunu açıqlayıb, amma konkret dövlətlərin adlarını çəkməyib.
Çinin gömrük məlumatlarına görə, Çin və CELAC bloku arasında ikitərəfli ticarət həcmi 2023-cü ildəki 450 milyard dollardan 2024-cü ildə 515 milyard dollara çatıb.
Bölmənin digər xəbərləri
