Çin Vaşinqtonu ÜST ekspertlərini ölkəyə dəvət etməyə çağırıb
Pekin, 10 fevral, AZƏRTAC
Çin Vaşinqtonu COVID-19 virusunun mənşəyini araşdırmaq üçün Ümumdünya Səhiyyə Təşkilatının (ÜST) ekspertlərini ölkəyə dəvət etməyə çağırıb.
AZƏRTAC xəbər verir ki, Çin Xarici İşlər Nazirliyinin rəsmisi Van Venbin belə bəyanatla çıxış edərək, Birləşmiş Ştatların virusun mənşəyinin araşdırılması üçün açıq və şəffaf yanaşma göstərməli olduğunu deyib. Çin tərəfinin bu bəyanatı Vaşinqtonun Çin-ÜST birgə missiyasının Uxanda apardığı araşdırmaların nəticələrini öz kəşfiyyat məlumatlarına əsaslanaraq müstəqil şəkildə yoxlamadan qəbul etməyəcəyini açıqlamasından sonraya təsadüf edir.
Çin XİN rəsmisi virusun mənşəyinin müəyyən edilməsinin kompleks məsələ olduğunu və bunun üçün bütün dünya səviyyəsində elmi araşdırmaların aparılmasının vacibliyini vurğulayıb. Artıq bu araşdırmaların Çin mərhələsi başa çatıb.
Qeyd edək ki, COVID-19 virusunun mənşəyinin tapılması üçün ÜST-nin missiyası çinli mütəxəssislərlə birgə virusun ilk aşkarlandığı Uxan şəhərində araşdırmaları başa çatdırıblar. ABŞ Dövlət Departamenti bu araşdırmaların şəffaflığının şübhə doğurduğunu bildirib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
