Çində 1961-ci ildən bəri ən isti yay qeydə alınıb
Bakı, 6 sentyabr, AZƏRTAC
Çində 1961-ci ildən - ölkədə tam meteoroloji müşahidələrə başlandığı ildən bəri ən isti yay qeydə alınıb.
AZƏRTAC Sinxua agentliyinə istinadla bu barədə xəbər verir.
Çin Xalq Respublikasının (ÇXR) Dövlət Klimatologiya Mərkəzinin məlumatına görə, iyunun 1-dən avqustun 31-dək olan dövrdə ölkədə havanın orta temperaturu 22,3 dərəcə Selsi təşkil edib. Bu, adi illərin eyni dövrü ilə müqayisədə 1,1 dərəcə Selsi yüksəkdir və 1961-ci ildən bəri ən yüksək göstəricidir.
Qurumun məlumatına görə, ümumilikdə əyalət səviyyəli 17 inzibati vahiddə, o cümlədən Hunan əyaləti (Mərkəzi Çin) və ölkənin cənub-qərbində yerləşən Çuntsin şəhərində yay rekord dərəcədə isti keçib.
Çində milli səviyyədə 366 meteoroloji stansiya temperaturun bundan əvvəlki rekorda çatdığını və ya bu rekordu geridə qoyduğunu xəbər verib. Ümumilikdə 15 stansiya 44 dərəcə Selsiyə çatan və ya onu üstələyən temperaturu qeydə alıb.
ÇXR Dövlət Klimatologiya Mərkəzində qeyd ediblər ki, ölkədə yağıntının orta miqdarı 1961-ci ilin həmin dövrü ilə müqayisədə ikinci ən aşağı göstərici olub. Mərkəz proqnozlaşdırıb ki, payızda ölkənin əksər rayonlarında havanın temperaturu təqribən adi illərdə olduğu kimi və yaxud ondan bir az yuxarı olacaq.
Bölmənin digər xəbərləri
