“Çıraqov və digərləri Ermənistana qarşı” işi üzrə zərərçəkmişlər Laçına səfər ediblər VİDEO
Bakı, 25 avqust, AZƏRTAC
Avropa İnsan Hüquqları Məhkəməsinin “Çıraqov və digərləri Ermənistana qarşı” işi üzrə 2015-ci ildə qəbul etdiyi qərara əsasən zərərçəkmiş kimi tanınan məcburi köçkünlər Laçın rayonuna səfər ediblər. Səfər zamanı həmin məcburi köçkünləri Avropa İnsan Hüquqları Məhkəməsi yanında Azərbaycan Respublikasının səlahiyyətli nümayəndəsi, Azərbaycan Ali Məhkəməsinin sədr müavini Çingiz Əsgərov müşayiət edib.
2015-ci ildə Avropa İnsan Haqları Məhkəməsinin “Çıraqovlar və digərləri Ermənistana qarşı” işi üzrə qərarı ilk və yeganə beynəlxalq məhkəmə sənədidir ki, Ermənistanın Azərbaycan ərazilərini işğal etməsi faktı sübut və təsdiq olunur. Avropa İnsan Haqları Məhkəməsinin qərarında bildirilir ki, Azərbaycanın işğal altında olan ərazilərində insan hüquqlarının pozuntusu ilə bağlı bütün hallara görə məsuliyyəti məhz Ermənistan daşıyır. Qərar üzrə Ermənistanın daha bir öhdəliyi azərbaycanlı məcburi köçkünlərin birbaşa Ermənistan dövlətinə qarşı iddialarına baxılması üçün mexanizm yaratmasıdır. Ötən 7 ildə Ermənistan nəinki bu mexanizmi yaratmayıb, Avropa Şurası Nazirlər Komitəsi də bunun üçün Ermənistana heç bir təzyiq etməyib. Ermənistan, həmçinin 7 ildir ki, Avropa İnsan Haqları Məhkəməsinin qərarına hörmətsizlik edərək, azərbaycanlı məcburi köçkünlərə təzminatı ödəmir.
Laçına səfər edənlər arasında Fəxrəddin Paşayev də var. Uzun illər sonra doğma yurduna ayaq basan F.Paşayev Laçınla bağlı xatirələrini yada salıb, o günləri bir daha xatırlayıb. Həmçinin Ermənistanın işğalçılıq siyasətindən, Laçından köçkün düşmələrindən, erməni vəhşiliyindən danışıb. AZƏRTAC-a açıqlamasında Ermənistanın barbar və vəhşi dövlət olduğunu sübut etmək üçün daim yollar axtardıqlarını bildirən F.Paşayev deyib: “Biz vətəndaş olaraq hüquqi müstəvidə yollar axtardıq ki, Ermənistana qarşı öz məqsədimizi ortaya qoyaq. 2005-ci ildə Avropa İnsan Hüquqları Məhkəməsinə ərizə ilə müraciət etdik. Təxminən bir il sonra ərizələrimiz icraata götürüldü. Məhkəmə 10 ildən sonra 3 maddə üzrə bizim hüquqlarımızı tanıdı və Ermənistan günahkar elan olundu. Bir il sonra Avropa İnsan Hüquqları Məhkəməsi tərəfindən “Çıraqov və digərləri Ermənistana qarşı” işi üzrə zərərçəkmişlərin hər birinə 5 min avro təzminat ödənilməsinə qərar verildi. Ermənistan hələ də bu təzminatı ödəmir. Lakin inanırıq ki, biz bu təzminatı ödətdirəcəyik. İddialarımız tam təmin olunana qədər Ermənistana qarşı öz mübarizəmizi dayandırmayacağıq”.
Azərbaycan Respublikasının Ali Məhkəməsinin sədr müavini Çingiz Əsgərov isə bildirib ki, “Çıraqov və digərləri Ermənistana qarşı” işi üzrə qərar ilk beynəlxalq məhkəmə qərarıdır. “Avropa İnsan Hüquqları Məhkəməsinin həmin qərarı ilə Ermənistanın Azərbaycana qarşı hərbi təcavüzü, Azərbaycan torpaqlarının işğal faktı sübuta yetirilir və Ermənistan işğalçı dövlət kimi tanınır. Ermənistan məcburi köçkünlərin hüquqlarının pozulmasına görə məsuliyyət daşıyır. Həmin qərarla azərbaycanlı məcburi köçkünlərin mülkiyyət hüququnun, insana, ailəyə hörmət hüququnun pozulması səbəbindən kompensasiya təyin edilib. Lakin Ermənistan Respublikası bəhanələrlə kompensasiyanı ödəməkdən boyun qaçırır. Çünki düşünürlər ki, kompensasiya ödəməklə onlar məsuliyyət daşıyan dövlət kimi tanınacaqlar. Artıq Avropa Məhkəməsi onları məsuliyyət daşıyan dövlət kimi tanıyıb. Biz hazırda tədbirlər görürük ki, Avropa Şurasının Nazirlər Komitəsində bununla bağlı qərar çıxarılsın və Ermənistana təzyiq göstərilsin ki, kompensasiya ödənilməlidir”.
“Biz 30 il davam edən işğal nəticəsində məcburi köçkünlərimizin pozulmuş hüquqlarının bərpasını istəyirik. Avropa Məhkəməsinə məhz bu məqsədlə müraciət olunub ki, bütün vətəndaşların mülkiyyət və yaşam hüquqları bərpa edilsin”, - deyə o vurğulayıb.
Rayonun Çıraqlı, Kamallı və Ağbulaq kəndlərindən olan məcburi köçkünlər səfər zamanı evlərinin qalıqlarına baş çəkiblər. Sakinlər 30 illik Vətən həsrətindən sonra doğma yurd-yuvalarına qayıtmaqdan sonsuz sevinc duyduqlarını söyləyiblər.
Bölmənin digər xəbərləri
