“Cümhuriyyətə işıq saçan qadınlar” adlı araşdırma-yazı müsabiqəsinə yekun vurulub VİDEO
Bakı, 7 may, Xəyalə Məmmədova, AZƏRTAC
Ulu öndər Heydər Əliyevin anadan olmasının 95 illiyi münasibətilə təşkil edilən “Cümhuriyyətə işıq saçan qadınlar” adlı araşdırma-yazı müsabiqəsinin yekunlarına həsr olunan tədbir keçirilib.
AZƏRTAC xəbər verir ki, müsabiqə Ailə, Qadın və Uşaq Problemləri üzrə Dövlət Komitəsi, Yeni Azərbaycan Partiyası Qadınlar Şurası və Milli İrsi Mədəni Tarixi Araşdırmalar Fondu tərəfindən birgə təşkil edilib.
Tədbir iştirakçıları Fəxri xiyabanda ulu öndər Heydər Əliyevin məzarını ziyarət edərək önünə gül dəstələri qoyublar.
Əvvəlcə Azərbaycan Respublikasının dövlət himni səsləndirilib. Sonra “Heydər Əliyev və dövlət qadın siyasəti” adlı qısa film nümayiş etdirilib.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib ki, Cümhuriyyətin 100 illik yubileyinin respublika səviyyəsində keçirilməsi haqqında Prezident İlham Əliyevin Sərəncamını əsas götürərək təşkil edilən bu müsabiqə Cümhuriyyətin qurulmasında rolu olan qadınların həyat və fəaliyyətini işıqlandırmaq, eyni zamanda, hələ də araşdırılmamış arxiv materialları əsasında onları tanıtmaq məqsədi daşıyırdı. Hicran Hüseynova bu müsabiqənin həm də ulu öndər Heydər Əliyevin anadan olmasının 95 illiyi ərəfəsində keçirilməsinin təsadüfi olmadığını vurğulayıb. Qeyd edib ki, belə tədbirlərin təşkili ilə Ümummilli Lider tərəfindən əsası qoyulan dövlət qadın siyasətinin əhəmiyyəti, qadınların cəmiyyətdə rolunun artması ilə bağlı onun rəhbərliyi altında reallaşdırılan islahatlar, həmçinin Azərbaycan Respublikasının Prezidenti İlham Əliyevin rəhbərliyi ilə bu istiqamətdə həyata keçirilən siyasət barədə ictimaiyyət ətraflı məlumatlandırılır. Hicran Hüseynova vurğulayıb ki, ölkəmizdə aparılan ardıcıl və uğurlu siyasət qadınların vəziyyətinə və cəmiyyətdəki mövqeyinə də müsbət təsir göstərir. Ümummilli lider Heydər Əliyevin adını daşıyan Fondun prezidenti, Birinci-vitse prezident Mehriban Əliyevanın təşəbbüsü ilə bu sahədə həyata keçirilən layihələrin böyük önəmi var.
Komitə sədri əlavə edib ki, müsabiqəyə təqdim edilən yazılar kitab halında nəşr edilib.
“Bu gün Azərbaycan qüdrətli, öz taleyinin sahibi olan bir dövlətdir”, - deyən Milli Məclis sədrinin müavini Bahar Muradova bildirib ki, Azərbaycan Xalq Cümhuriyyətinin 100 illiyi ərəfəsində belə bir tədbirin keçirilməsi təqdirəlayiq haldır. Müsabiqədə yer alan yazıların cəmləşdiyi toplu qadın problemləri ilə məşğul olan hər kəsin stolüstü kitabına və dəyərli mənbəyə çevriləcək. “Bu layihə vasitəsilə Azərbaycan gəncliyinə həm də bir yol göstərmiş oluruq”, - deyə o vurğulayıb. Bahar Muradova deyib ki, Azərbaycan Xalq Cümhuriyyəti XX əsrdə Azərbaycan xalqının həyatında tarixi mərhələ olub, xalqımızın müstəqilliyinin və suverenliyinin, parlaq gələcəyinin bünövrəsini qoyub.
Bakı Slavyan Universitetinin rektoru, YAP Qadınlar Şurasının sədri Nurlana Əliyeva qeyd edib ki, Azərbaycan Xalq Cümhuriyyəti mövcud olduğu qısa zaman kəsiyində dövlətçilik ənənələrinin formalaşdırılması və mütərəqqi idarəçilik institutlarının təsis edilməsi baxımından yüksək nəticələr əldə etməyə nail olub. Bu gün xalqın tarixi keçmişinin ondan gizlədilən səhifələrini yenidən oxumaq, onun ən yaxşı oğullarının və onların xanımlarının nəcib təşəbbüslərini, fəaliyyətlərini müasirlərimizin nəzərinə çatdırmaq hər bir tarixçinin, tədqiqatçının və hər bir vətəndaşın birinci dərəcəli vəzifəsidir.
Milli Məclisin əmək və sosial siyasət komitəsinin sədri Hadı Rəcəbli Azərbaycan Xalq Cümhuriyyətinin 100 illik yubileyinə, xalqımızın ümummilli lideri Heydər Əliyevin anadan olmasının 95 illiyinə həsr edilən müsabiqənin qaliblərini təbrik edib. Qeyd edib ki, Ulu Öndər qadınlarla bağlı dövlət siyasətinə xüsusi önəm verir, bunu prioritet vəzifələrindən biri hesab edirdi.
Milli Televiziya və Radio Şurasının sədr müavini, “Kaspi” qəzetinin təsisçisi Sona Vəliyeva müstəqil Azərbaycan dövlətçiliyinin siyasi, iqtisadi əsaslarını yaratmış, xalqın güclü dövlətə sahib olmaq arzusunu reallığa çevirmiş fenomen şəxsiyyət kimi Heydər Əliyevin çağdaş tariximizdə əbədiyaşarlıq qazanaraq hələ sağlığında canlı əfsanəyə çevrildiyini vurğulayıb. O bildirib ki, 1918-ci il mayın 28-də elan edilmiş Azərbaycan Xalq Cümhuriyyəti cəmi 23 ay mövcud olub və qadınlara səsvermə hüququ verən ilk respublika da məhz bu dövlət olub. “Cümhuriyyətçi qadınlar bizim qürur yerimizdir. Onlar o zaman hər əzab-əziyyətə dözərək dövlətçilik ənənələrinə sadiq qalıblar”, - deyən Sona Vəliyeva ulu öndər Heydər Əliyevin və bu gün onun siyasətini uğurla davam etdirən Prezident İlham Əliyevin də hər zaman qadınların fəaliyyətini dəstəklədiklərini vurğulayıb.
Milli Məclisin ailə, qadın və uşaq məsələləri komitəsinin sədri Aqiyə Naxçıvanlı müsabiqə iştirakçılarının belə bir layihədə iştirak etmələrinin əhəmiyyətini vurğulayıb, qalibləri təbrik edib. O, Cümhuriyyət dövründə yaşayan, yaradan qadınları hər bir gəncin tanımasının və onların irsi haqqında məlumatlı olmalarının vacibliyini vurğulayıb.
Sonra Milli İrsi Mədəni Tarixi Araşdırmalar Fondunun icraçı direktoru Pərviz Əmirov, Bakı Dövlət Universitetinin jurnalistika fakültəsinin kafedra müdiri Cahangir Məmmədli, Azərbaycan Respublikasının Prezidenti yanında Dövlət İdarəçilik Akademiyasının professoru Elçin Əhmədov çıxış edərək müsabiqənin əhəmiyyətini vurğulayıblar. Müsabiqənin yazılarının toplandığı nəşr mədəni-maarif xəzinəsi, tarixi mənbə adlandırılıb.
Qeyd edək ki, müsabiqəyə 98 nəfər qatılmışdı. Yazılardan 67-si toplu şəklində nəşr edilib.
Sonda qaliblərə mükafatlar və hədiyyələr təqdim olunub.
Tədbir bədii hissə ilə davam edib.
Bölmənin digər xəbərləri
