DAHA 17 TƏLƏBƏ ARDNŞ-İN TƏQAÜDÜNƏ LAYİQ GÖRÜLMÜŞDÜR
Bu günlərdə Neft Akademiyasının tələbələrinə ARDNŞ-in təqaüdünün verilməsi üzrə müsahibə komissiyasının növbəti iclası keçirilmişdir. Komissiya geoloji-kəşfiyyat, qaz-neft-mədən, kimya-texnologiya, neft-mexanika, energetika, istehsal proseslərinin avtomatlaşdırılması, iqtisadiyyat, beynəlxalq münasibətlər və menecment fakültələrindən ARDNŞ təqaüdünə təqdim edilən 30 nəfər 2-ci kurs tələbəsi ilə müsahibə keçirmişdir. Onların hər biri ilə ayrı-ayrılıqda söhbət aparılmış, tələbələrin 1-ci tədris ilində təhsildə əldə etdikləri nəticələr araşdırılmışdır. Müsahibə komissiyasının qərarı ilə həmin tələbələrin 17-nə ayda 40 manat məbləğində ARDNŞ təqaüdü veriləcək. Qeyd edək ki, ARDNŞ təqaüdünün verilməsinə dair yeni qaydalara əsasən bu ildən hər bir təqaüdçünün adına Azərbaycan Beynəlxalq Bankında kart hesabları açılacaq və təqaüdlər aybaay həmin hesaba köçürüləcəkdir.
Qeyd edək ki, təqaüd proqramı Azərbaycan Prezidenti İlham Əliyevin tapşırığı əsasında şirkətdə həyata keçirilən kadr hazırlığı prosesinin tərkib hissəsidir.
Bölmənin digər xəbərləri
