Daşkənddə Xocalı faciəsinin 21-ci ildönümü ilə əlaqədar anma mərasim keçirilmişdir
Daşkənd, 23 fevral (AZƏRTAC). Daşkənddəki Heydər Əliyev adına Azərbaycan Mədəniyyət Mərkəzində Xocalı faciəsinin 21-ci ildönümü ilə əlaqədar anma mərasimi keçirilmişdir.
Tədbirdə Daşkənddəki diasporumuzun üzvləri, qardaş özbək xalqının nümayəndələri, jurnalistlər iştirak etmişlər.
Mərasim iştirakçıları Mərkəzin foyesində Xocalı soyqırımını əks etdirən fotosərgi, həmçinin Heydər Əliyev Fondu tərəfindən nəşr olunmuş “Qarabağ həqiqətləri” silsiləsindən nəşrlər və ermənilərin azərbaycanlılara qarşı uzun illər apardıqları mənfur siyasətdən bəhs edən digər kitablarla tanış olmuşlar.
Şəhidlərin xatirəsi bir dəqiqəlik sükutla yad olunmuşdur.
Azərbaycanın Özbəkistandakı səfiri Hüseyn Quliyev 21 il əvvəl Ermənistan silahlı qüvvələri tərəfindən Xocalı şəhərinin dinc əhalisinə divan tutulması haqqında məlumat vermiş və ermənilərin zaman-zaman xalqımıza qarşı apardıqları soyqırımı siyasətindən danışmışdır.
Səfir dünya ölkələrində Xocalı soyqırımının tanınması haqqında da söhbət açmışdır. Bildirmişdir ki, artıq dünyanın altı ölkəsi və Amerika Birləşmiş Ştatlarının beş ştatı Xocalı soyqırımını tanımışdır və bu istiqamətdə iş aparılır.
Sonra “Bakı film” kinostudiyasının istehsalı olan “Xoca” bədii filmi göstərilmişdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
