Dayanıqlı sosial-iqtisadi inkişafda qadınların rolu - beynəlxalq simpozium
Bakı, 6 mart, AZƏRTAC
Azərbaycan Dövlət İqtisad Universitetində (UNEC) “Dayanıqlı sosial-iqtisadi inkişafda qadınların rolu” mövzusunda I beynəlxalq simpozium keçirilib.
Universitetdən AZƏRTAC-a bildirilib ki, simpoziumu UNEC Xanım Tədqiqatçılar Şurası 8 Mart - Beynəlxalq Qadınlar Günü münasibətilə təşkil edib.
Əvvəlcə tədbir iştirakçıları Ulu Öndər Heydər Əliyevin büstünün və şəhidlər abidəsinin önünə gül dəstələri düzərək əziz xatirələrini ehtiramla yad ediblər.
Simpoziumu açan UNEC-in rektoru professor Ədalət Muradov tədbirin əsas məqsədinin qadın tədqiqatçıları və sahibkarları bir araya gətirərək onların dayanıqlı inkişaf, innovasiya və sosial transformasiya proseslərində rolunu elmi müstəvidə müzakirə etmək, həmçinin beynəlxalq akademik əməkdaşlığı və elmi dialoqu genişləndirmək olduğunu qeyd edib.
Rektor UNEC-in elmi fəaliyyətində xanım tədqiqatçıların roluna diqqət çəkərək deyib: “2025-ci ildə “Scopus” bazasında indekslənən 1120 elmi əsərin 33 faizi qadın tədqiqatçılar tərəfindən yazılıb. Bu əsərlərin 52 faizi beynəlxalq istinadlar alıb və universitetin ümumi istinadlarının 27 faizini təşkil edir”.
“Prezidentin “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə rəqəmsal texnologiyalar və süni intellektin inkişafı ilə bağlı verdiyi tapşırıqlara töhfə vermək məqsədilə UNEC-də xanımlar üçün süni intellekt savadlılığı üzrə uzunmüddətli onlayn təlim proqramlarına başlamağı təklif edirəm”, - deyə rektor bildirib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxışında elmi mühitdə çalışan alimlərin cəmiyyət üçün nümunəvi model yaratdıqlarını vurğulayıb. B.Muradova elmin missiyasının bəşəriyyət naminə bilik yaratmaq olduğunu və bu prosesdə qadınların potensialından sistemli istifadənin vacibliyini qeyd edib.
Milli Məclisin Ailə, qadın və uşaq məsələləri komitəsinin sədri, professor Hicran Hüseynova UNEC-də xanımların elm və tədris sahəsindəki fəaliyyəti üçün yaradılmış geniş imkanları yüksək qiymətləndirib. H.Hüseynova dövlətimizin başçısının müvafiq Fərmanı ilə Rəqəmsal İnkişaf Şuranın yaradılmasının əhəmiyyətinə diqqət çəkib, Birinci vitse-prezident Mehriban Əliyevanın Şuraya rəhbərliyinin ölkənin texnoloji və strateji tərəqqisi üçün çox önəmli olduğunu bildirib.
Azərbaycanda Qadın Sahibkarlığının İnkişafı Assosiasiyasının İdarə Heyətinin sədri Səkinə Babayeva isə güclü ailə modelinin və düzgün idarəetmənin sağlam cəmiyyət üçün təməl olduğunu qeyd edərək, qadınların həm biznesdə, həm də sosial həyatda artan fəallığının ölkənin iqtisadi potensialının güclənməsində həlledici rol oynadığını vurğulayıb.
Sonda UNEC Xanım Tədqiqatçılar Şurasının sədri Nərgiz Hacıyeva rəhbəri olduğu şuranın fəaliyyəti barədə məlumat verib. Həmçinin gender tədqiqatları, qadınların elmdə roluna həsr olunmuş UNEC-in “International Journal of Gender”, “Knowledge and Social Futures” adlı beynəlxalq elmi jurnalını və Azərbaycanın 32 qadının sahibkarlıq fəaliyyətini əks etdirən “Odlar Yurdunun yeddi portreti” kitabını təqdim edib.
Bölmənin digər xəbərləri
