Daşkənd, 15 dekabr, AZƏRTAC

MDB-yə üzv ölkələrin Dövlətlərarası Humanitar Əməkdaşlıq Fondunun təsis etdiyi memarlıq və şəhərsalma sahəsi üzrə “Debütlər Birliyi” beynəlxalq mükafatını mənə İçərişəhər ərazisində “Xan bağı” layihəsinə, Pirşağı və Əmircan kəndləri, Pirəhmədli kəndinin bərpası və yenidənqurulması layihəsinə, Dayanıqlı İnkişaf Məqsədlərinin gənc səfiri kimi fəaliyyətimə görə təqdim ediblər.

Bu fikirləri AZƏRTAC-a müsahibəsində gənc azərbaycanlı memar, bu günlərdə “Debütlər Birliyi” beynəlxalq mükafatına layiq görülən İlqar Manaflı bildirib.

O deyib: “Bu, mənim üçün tamamilə gözlənilməz idi. Axı mən öz işlərimi müsabiqəyə təqdim etməmişdim. Buna görə də MDB-yə üzv ölkələrin Dövlətlərarası Humanitar Əməkdaşlıq Fondunun İdarə Heyətinin sədri, Azərbaycan Respublikasının Rusiya Federasiyasındakı səfiri Polad Bülbüloğlunun mənə təqdim etdiyi bu mükafatı almaq mənim üçün çox xoş idi. MDB-nin yaradıcı və elmi ziyalılarının forumunun işində mənim doğma ali məktəbimin - Azərbaycan Memarlıq və İnşaat Universitetinin rektoru Gülçöhrə Məmmədovanın iştirakı mənim üçün ikiqat sevindirici hal idi. Mən orada G.Məmmədovaya bu ali məktəbdə əldə etdiyim bilik və bacarıqlara görə öz minnətdarlığımı bildirdim”.

İ.Manaflı Azərbaycan Memarlıq və İnşaat Universitetini bitirib. Sonra ali təhsilini Avstriyadakı “Donau University”də davam etdirib. Gənc memar iqlim şəraiti və yerin ekologiyasının qorunub saxlanması nəzərə alınmaqla memarlığın nəzəriyyə və praktikasını öyrənir.

İ.Manaflı 2017-ci ildə təsis etdiyi “MANARCH” memarlıq studiyasında öz ətrafına özü kimi təşəbbüskar və yenilikçi gəncləri toplayıb. Elə həmin il studiya tenderdə qalib gələrək “Xan bağı” layihəsini həyata keçirməyə başlayıb. Layihənin icra olunduğu iki il ərzində studiya xarici şirkətlərlə əməkdaşlıq edib, böyük yaradıcı təcrübə qazanıb.

O, 2018-ci ildə Dayanıqlı İnkişaf Məqsədlərinin gənc səfiri seçilib. 11-ci Məqsəd - dayanıqlı şəhərlər və yaşayış məntəqələridir.

İ.Manaflı Qarabağda və Abşeronda şəhərsalma sahəsində bir sıra layihələrin müəllifidir.