Deputat: Azərbaycan güclü dövlət kimi önəmli beynəlxalq platformalara dəvət alır
Bakı, 17 may, AZƏRTAC
Prezident İlham Əliyevin Avropa Siyasi Birliyinin Albaniyanın paytaxtı Tiranada keçirilən 6-cı Zirvə toplantısına dəvət olunması Azərbaycanın nüfuzunun göstəricisidir.
Bu fikirləri AZƏRTAC-a açıqlamasında Milli Məclisin deputatı Könül Nurullayeva deyib.
Deputatın fikrincə, adıçəkilən qurum öz sıralarında Azərbaycanı görmək, müzakirə olunan taleyüklü məsələlərlə bağlı rəsmi Bakının da mövqeyini dinləmək istəyir. "Çünki Azərbaycan qlobal proseslərə ədalətli yanaşması, özünün nüfuzu və çəkisi ilə diqqət cəlb edir. Bu, Azərbaycanın artan nüfuzu, verdiyi sözə əməl etməsi ilə birbaşa bağlıdır. Bu gün yaranmış mənzərə onu deməyə əsas verir ki, yalnız regional deyil, dünya miqyasında bir çox məsələlərdə Azərbaycanın mövqeyi önəmli hesab olunur.
Avropa Siyasi Birliyi bəyan edir ki, bu siyasi koordinasiya platforması heç bir mövcud təşkilatı, strukturu və ya prosesi əvəz etmir. Sadəcə, ümumi maraq doğuran məsələlərin həlli üçün siyasi dialoqu və əməkdaşlığı inkişaf etdirməyə ehtiyac var. Bütün səylər yeni geosiyasi dəyişikliklər fonunda Avropa qitəsinin təhlükəsizliyini, sabitliyini və rifahını gücləndirməyə hesablanıb".
Onun sözlərinə görə, Avropa Siyasi Birliyinin 3 il əvvəl – 2022-ci ildə Praqada keçirilən ilk sammitində də Azərbaycanın dövlət başçısı iştirak edirdi. Bu sammit ölkəmiz üçün bir neçə vacib məqamlarla yadda qalmışdı.
Dövlətimizin başçısının strateji xarici siyasi baxışı və yürütdüyü siyasət nəticəsində Praqa sammitində Fransa, Avropa İttifaqı və Ermənistanın ölkəmizə qarşı qərəzli planı faktiki pozuldu. Belə ki, Nikol Paşinyan və Makron Praqa sammitində Azərbaycanın ərazi bütövlüyünü tanımağa və Alma-Ata Bəyannaməsinə istinad etməyə məcbur edildi. Yada salmaq yerinə düşər ki, Praqa sammiti zamanı Azərbaycanın suverenliyi tam təmin edilməmişdi. Eyni zamanda, Rusiya sülhməramlıları da hələ Azərbaycan ərazisində idi. Bu sammitdən 11 ay sonra Azərbaycan öz suverenliyini təmin etdi. Ona görə Ermənistanda revanşist qüvvələr, hətta Rusiyada bəzi ekspertlər Praqada qəbul edilən bəyanatı bu gün də tənqid edirlər. Amma artıq hər kəs mövcud reallıqla barışmağa məcburdur.
Tiranada da Azərbaycan Prezidenti xüsusi ehtiramla qarşılandı. Sammitin budəfəki gündəliyində yer alan məsələlərin müzakirəsində Azərbaycanın iştirakı zəruri idi. Sammit çərçivəsində aparılan müzakirələr zamanı Aİ regional münasibətlərə, sülh və təhlükəsizliyin təmin olunmasına sərmayə qoymağa, bütün regionu bir-birinə yaxınlaşdırmağa hazır olduğunu bəyan etdi. Bu prosesdə Azərbaycan kimi nüfuzlu dövlətin töhfəsi Avropa üçün vacibdir.
"Bu gün Azərbaycan beynəlxalq miqyasda regional gücə çevrilib. Xüsusilə yeni dünya düzəninin formalaşdığı bir vaxtda Azərbaycan kimi etibarlı dövlətlərin rolu artmaqdadır. Ölkəmiz bu gün Cənubi Qafqazın ən güclü dövləti, Xəzər regionunun isə nüfuzlu gücü kimi önəmli beynəlxalq platformalara dəvət alır", -deyə Könül Nurullayeva vurğulayıb.
Bölmənin digər xəbərləri
