Deputat: Ən mühüm strateji vəzifələrdən biri Qərbi Azərbaycana qayıtmaqdır
Bakı, 11 yanvar, AZƏRTAC
Heç kimə sirr deyil ki, XIX əsrdə çar Rusiyası tərəfindən Osmanlı və İran ərazisindən ermənilərin kütləvi şəkildə Cənubi Qafqaza köçürülməsi ilə azərbaycanlıların öz tarixi torpaqlarında sıxışdırılması prosesinə başlanılıb. XX əsrin əvvəllərində azərbaycanlılara qarşı məqsədyönlü şəkildə həyata keçirilmiş etnik təmizləmə, soyqırımı siyasəti nəticəsində xalqımız ağır məhrumiyyətlərlə, faciələrlə üzləşib. Mərhələ-mərhələ gerçəkləşdirilən bu plan nəticəsində azərbaycanlılar indi Ermənistan adlandırılan ərazidən - min illər boyu yaşadıqları öz doğma tarixi torpaqlarından qovularaq kütləvi qətl və qırğınlara məruz qalıb, xalqımıza məxsus minlərlə tarixi-mədəni abidə və yaşayış məskənləri məhv edilib.
Bu fikirləri AZƏRTAC-a açıqlamasında Milli Məclisin deputatı Vüqar İskəndərov deyib.
O bildirib ki, erməni millətçiləri tərəfindən Azərbaycan xalqının mənəviyyatına, milli qüruruna və mənliyinə yönəlmiş böhtanlar azərbaycanlılara qarşı siyasi və hərbi təcavüz üçün ideoloji zəmin yaradıb. Ermənilərin sovet rejiminin imkanlarından istifadə edərək həyata keçirdikləri anti-Azərbaycan təbliğatı 1980-ci illərin ortalarında daha da güclənib. Bütün məhrumiyyətlərə, deportasiyalara baxmayaraq, 1988-ci ilə qədər Ermənistanda azərbaycanlıların yaşadıqları ərazi respublika ərazisinin (29.8 min kvadratkilometr) 25 faizini, yaxud təqribən 7.5 min kvadratkilometrini təşkil edib. 1988-1989-cu illərdə azərbaycanlıların tarixi-etnik torpaqlarından - Ermənistandan növbəti deportasiyası baş verib, nəticədə 250 min azərbaycanlı qaçqın düşüb.
V.İskəndərovun sözlərinə görə, uzun illər Qərbi azərbaycanlılar öz hüquqlarından məhrum idilər. Lakin Prezident İlham Əliyevin də bəyan etdiyi kimi Qarabağ dərdi, problemi olan yerdə Qərbi azərbaycanlıların hüquqlarından danışmaq bəlkə də vaxtından əvvəl atılan bir atəşə bənzəyə bilərdi. İndi isə şərtlər dəyişib və biz tam haqlı olaraq bu mövzunu artıq beynəlxalq arenaya çıxarmışıq.
Deputat qeyd edib ki, ötən il dekabrın 24-də Prezident İlham Əliyev Qərbi Azərbaycan İcmasının bir qrup üzvü ilə görüşündə bu məsələnin üzərində xüsusi olaraq dayandı. Həmin çıxışında dövlətimizin başçısı xalqımızın uzun illər üzləşdiyi faciələri xatırlatmaqla yanaşı, müasir şəraitdə qarşıda duran vəzifələrə də toxundu. Məhz bu baxımdan qeyd edə bilərik ki, hazırda yaranmış yeni reallıqlar kontekstində xalqımızın qarşısında duran ən mühüm strateji vəzifələrdən biri tarixi torpaqlarımıza, Qərbi Azərbaycana qayıtmaqdır.
“Prezident İlham Əliyev yanvarın 10-da yerli televiziya kanallarına müsahibəsində yenidən bu məqama toxundu. Dövlətimizin başçısı bir daha bəyan etdi: “Qərbi azərbaycanlılar öz dədə-baba torpaqlarına qayıtmalıdırlar, bu, onların hüququdur, bütün beynəlxalq konvensiyalar bu hüququ onlar üçün tanıyır. Biz də Azərbaycan dövləti olaraq əlimizdən gələni etməliyik ki, bu hüququ təmin edək. Yenə də mən orada da İcmanın nümayəndələri ilə görüş zamanı demişdim ki, biz bunu sülh yolu ilə etmək istəyirik və əminəm ki, buna nail olacağıq”. Bir sözlə, Prezident İlham Əliyevin də bəyan etdiyi kimi azərbaycanlıların öz tarixi vətənlərinə, evlərinə qayıdışı dünyadakı təməl insan hüquqlarından biridir. Yəni, beynəlxalq hüquq bizim tərəfimizdədir. Ermənistan dövləti bir an öncə İnsan Hüquqlarının Ümumdünya Bəyannaməsində, Vətəndaş və Siyasi Hüquqlar haqqında Beynəlxalq Paktda öz əksini tapmış “geri qayıtma hüququ”nu tanımalıdır”, - deyə V.İskəndərov vurğulayıb.
Bölmənin digər xəbərləri
