Deputat: Laçın şəhərinin şəhid vermədən azad edilməsi Prezident İlham Əliyevin siyasi-diplomatik qələbəsidir
Bakı, 22 sentyabr, AZƏRTAC
İki il öncə 44 günlük Vətən müharibəsi düşmənə sarsıdıcı zərbə vurdu. Müzəffər Ali Baş Komandan İlham Əliyevin rəhbərliyi ilə rəşadətli Ordumuz misilsiz Qələbə qazandı və torpaqlarımızı işğaldan azad etdi. Azərbaycan Ordusunun rəşadəti və diplomatiyada üstünlük Ermənistanı işğal altında olan digər əraziləri məcburən qaytarmağa sövq etdi.
Bu fikirləri AZƏRTAC-a açıqlamasında Milli Məclisin deputatı Vüqar İskəndərov deyib.
“Bu kontekstdə Laçın kimi strateji şəhərin bir güllə atılmadan, şəhid vermədən azad edilməsi Prezident İlham Əliyevin böyük xidməti və siyasi-diplomatik qələbəsidir. Prezident İlham Əliyevin sentyabrın 21-də Laçına səfəri zamanı bəyan etdiyi kimi bu, tarixi hadisədir. Laçın şəhərinin azad edilməsi həmişə tarixdə qalacaq. Dövlətimizin başçısının Laçın şəhərinin mərkəzində qaldırdığı Azərbaycan Bayrağı orada əbədi dalğalanacaqdır. Bir sözlə, bizim 44 günlük Vətən müharibəmiz şanlı tariximizdir. Ancaq xüsusi strateji əhəmiyyətini, çətin relyefini, ağır, soyuq iqlimini nəzərə alsaq, Laçın və Kəlbəcər rayonlarının azad edilməsi xüsusi əhəmiyyət kəsb edir”, - deyə V.İskəndərov vurğulayıb.
Ermənilərin 30 illik işğal dövründə Laçında da misilsiz vəhşiliklər törətdiyini diqqətə çəkən deputat deyib: “1990-cı illərdə bizim məcburi köçkünlərimiz doğma torpaqlarından zorla çıxarılarkən onlar heç bir obyektə, evlərinə zərrə qədər də ziyan vurmamışdılar. Hətta vacib olan əşyalarından başqa hər şeyi orada qoymuşdular. Çünki bildirdilər ki, onlar o torpaqlara nə vaxtsa qayıdacaqlar. Bu yerlər bizim dədə-baba yurdumuzdur. Amma ermənilər isə əksinə, düşünürdülər ki, burada onlar müvəqqətidir. Ona görə bu rayonların heç birində, o cümlədən Laçında normal bir tikinti-quraşdırma işləri aparmamışdılar. Dövlətimizin başçısının bəyan etdiyi kimi Laçın şəhəri işğal altında olmuş bütün başqa yaşayış məntəqələrimiz kimi erməni vandalizminə məruz qalmışdır. Erməni vandalizminin təzahürləri hər bir kənddə, hər bir şəhərdə var. Ağdam şəhəri tamamilə yerlə-yeksan edilib, həmçinin Füzuli şəhəri, Cəbrayıl şəhəri və bütün kəndlər. Bəzi yerlərdə, o cümlədən Laçın şəhərində ermənilər qanunsuz məskunlaşma aparmışdılar, Ermənistandan və daha çox xaricdən - Suriya və Livandan erməni əsilli insanları gətirib burada qanunsuz yerləşdirmişdilər. Bu, hərbi cinayətdir, bütün beynəlxalq konvensiyalarda hərbi cinayət kimi təsbit edilir və bu cinayət dünya ictimaiyyətinin gözü qarşısında baş verib”.
Lakin artıq Laçının azad olduğunu qürur hissi ilə qeyd edən V.İskəndərov deyib: “Azərbaycan dövləti qısa zaman ərzində digər işğaldan azad edilmiş rayon və şəhərlərdə olduğu kimi, Laçında da genişmiqyaslı quruculuq, abadlıq işləri aparacaq. Laçın şəhəri, Zabux və Sus kəndləri, ilk növbədə, yenidən qurulacaq. Dövlətimizin başçısının əminliklə bəyan etdiyi kimi biz buna tez bir zamanda nail olacağıq. Çünki Vətən müharibəsindən sonra bu günə qədər keçən dövr ərzində gördüyümüz işlər - genişmiqyaslı quruculuq və bərpa işləri göstərir ki, biz doğma diyarımızı, Vətənimizi öz hesabımıza bərpa edirik və edəcəyik”.
Bölmənin digər xəbərləri
