Deputat: Prezident İlham Əliyev Münxendə Azərbaycanın qəti mövqeyini bir daha nümayiş etdirdi
Bakı, 21 fevral, AZƏRTAC
Münxen Təhlükəsizlik Konfransında Cənubi Qafqaz dövlətləri liderlərinin panel müzakirələrdə bir araya gəlməsini tarixi hadisə kimi qiymətləndirmək olar. Bölgədə sülhün bərqərar olması üçün bu görüş müsbət nəticə verə bilər. Lakin təəssüflə qeyd etmək lazımdır ki, qərbdəki bəzi qüvvələr, xüsusən də Fransa Prezidenti Emmanuel Makron bölgədə sülhün yaranmasına hər vasitə ilə maneə yaratmağa çalışır. Makron Münxendə çıxışı zamanı hər zaman Ermənistanın tərəfində olacağını bildirməklə Fransanın vasitəçilik missiyasının yerinə yetirilməsinin üzərindən xətt çəkmiş oldu.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Deputat bildirib ki, panel müzakirələrdə Paşinyan yazıq və "sülhsevər" obrazına girərək qərbdəki ağalarının dediklərini təkrarlamaqla yanaşı, bu dəfə böhtan və təxribat xarakterli çıxışı ilə yadda qaldı. Paşinyan dünya ictimaiyyətinin diqqətini guya Laçın dəhlizində ermənilərin humanitar böhran yaşadığına çəkməyə çalışdı və bu məsələdə Azərbaycan dövlətini ittiham etdi. Digər tərəfdən Qarabağda baş verənləri dini konteksə yönəltməyə cəhd göstərdi. Qarabağ və Şərqi Zəngəzurda ermənilər tərəfindən dağıdılmış məscidləri Sovet İttifaqının üzərinə yıxmağa çalışması isə əsl erməni xisləti idi. Paneldə moderatorun da təxribat xarakterli sualları diqqətdən yayınmadı. Belə ki, o, Laçın dəhlizində ermənilərin humanitar fəlakətlə qarşılaşmaları barədə təxribat xarakterli suallar verməklə sanki Paşinyana nədən danışmaq lazım olduğunu işarə edirdi.
“Prezident İlham Əliyev isə qətiyyətli şəkildə Azərbaycan dövlətinin, xalqının mövqeyini və bölgədə sülhün yaranmasına hər zaman tərəfdar olduğunu bildirdi. Ölkəmizin başçısı müharibə və postmüharibə dövründə regionda baş verən bütün hadisələri faktlarla hər kəsin diqqətinə çatdırdı. Laçın dəhlizində yolun bağlanmadığını, Rusiya sülhməramlı qüvvələrinin, Qırmızı Xaç Komitəsinin avtomobillərinin sərbəst formada hərəkət etdiyini vurğuladı. Laçın dəhlizi bağlı olsaydı, separatçı Vardanyan Qarabağdan İrəvana, Moskvaya və yenidən Qarabağa gedən yolu "su yoluna" döndərə bilməzdi.
Dövlətimizin başçısı ABŞ Dövlət katibi Blinkenin iştirakı ilə keçirilən üçtərəfli görüşdə, eləcə də panel iclasında bir daha Qarabağda yaşayan erməni əsilli Azərbaycan vətəndaşlarının təhlükəsizliyinə dövlətimiz tərəfindən zəmanət verildiyini bildirdi. Diqqətə çatdırdı ki, Azərbaycan başqa ölkədən göndərilən və Qarabağa aidiyyəti olmayan separatçı Vardanyanla hər hansı məsələ barədə müzakirə aparmaq fikrində deyil. Bu, Azərbaycan dövlətinin qəti mövqeyidir.
Dövlətimiz, Azərbaycan - Ermənistan münasibətlərinin normallaşmasında vasitəçilik etmək istəyən və ölkəmizin ərazi bütövlüyünü, suverenliyini tanıyıb hörmətlə yanaşan istənilən beynəlxalq təşkilat və ölkə ilə əməkdaşlıq etməyə hazırdır. Əlbəttə ki, Fransa istisna olmaqla”, - deyə K.Əliyeva qeyd edib.
Onun sözlərinə görə, paneldə Paşinyan və moderator kimi iştirak edən Avropa İttifaqının nümayəndəsinin “Dağlıq Qarabağ” ifadəsini işlətməsi haqlı olaraq Azərbaycan Prezidenti tərəfindən sərt şəkildə tənqid olunub.
Prezident İlham Əliyev həm Vətən müharibəsi, həm də postkonflikt dövründəki bütün çıxışlarında dünya ictimaiyyətinin dəfələrlə diqqətinə çatdırıb ki, Azərbaycanda “Dağlıq Qarabağ” adlı ərazi mövcud deyil. İndiyə qədər keçirilmiş görüşlərin yekun bəyannamələrində də “Dağlıq Qarabağ” ifadəsi yer almayıb.
“Münxendə Prezident İlham Əliyevin Laçın və Zəngəzur dəhlizlərində hər iki dövlət tərəfindən nəzarət - buraxılış məntəqələrinin yaradılması haqqında təklifi vasitəçilər tərəfindən müsbət qarşılandı. Əgər Ermənistan rəhbərliyi də bu təklifi müsbət dəyərləndirərsə, sülhə yaxınlaşmağa böyük töhfə vermiş olar. İstənilən halda Münxen görüşləri yaxınlaşmağa və sülh sazişinin imzalanmasına öz töhfəsini verəcək.
Bölmənin digər xəbərləri
