Bakı, 8 noyabr, AZƏRTAC

İki il əvvəl Vətən müharibəsində əldə etdiyimiz Qələbə ilə Azərbaycan Ordusu tarix yazdı. Qırx dörd gün ərzində Azərbaycan Ordusu bir addım belə geri çəkilmədi. Noyabrın 8-də Qarabağın tacı Şuşanın azad olunması bir daha şəhidlərimizin qanının yerdə qalmadığını göstərdi. 28 il ərzində Şuşa işğal altında qalsa da, hər bir Azərbaycanlı əmin idi ki, gec-tez biz tarixi torpağımıza, mədəniyyət beşiyimizə qayıdacağıq. Azərbaycan Prezidentinin də bəyan etdiyi kimi, Şuşasız bizim işimiz tam sayıla bilməzdi.

Bu fikirləri AZƏRTAC-a açıqlamasında Milli Məclisin deputatı Könül Nurullayeva söyləyib.

O bildirib ki, Azərbaycan xalqı 30 il ərzində bu tarixi anı gözləyirdi. Şuşaya hər zaman xüsusi münasibət olduğunu diqqətə çatdıran deputat deyib: "Tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olan Şuşanın tarixi hissəsinin qoruq elan edilməsi də 1977-ci ildə ulu öndər Heydər Əliyevin təşəbbüsü ilə baş tutub. Hələ 1977-ci ildən Şuşada abidələrin qorunması, görkəmli mədəniyyət və incəsənət xadimlərinin xatirələrinin əbədiləşdirilməsi istiqamətində əhəmiyyətli addımlar atılıb. İşğal zamanı Şuşanı erməniləşdirməyə cəhd etsələr də, buna nail ola bilməyiblər. Prezident İlham Əliyevin də söylədiyi kimi, bu, onlar üçün yad şəhərdir, özlərinin şəhəri saysaydılar, bu vəziyyətə salmazdılar.

İndi Şuşamız yenidən qurulur, abadlaşdırılır. Mədəniyyət paytaxtımız yerli və beynəlxalq tədbirlərin məkanına çevrilib".

K.Nurullayeva qeyd edib ki, işğal dövründə Azərbaycan hərbi imkanlarını genişləndirməklə yanaşı, həm də diplomatik cəbhədə diktə edən tərəfə çevrildi. Bu, döyüş meydanında da Azərbaycanın uğurlarını şərtləndirirdi. Vətən müharibəsində Ordumuz düşmənlə təkbaşına mübarizə apararaq, ərazi bütövlüyümüzü qarış-qarış təmin etdi. Ermənistan Şuşanın azad olunacağına inanmaq istəmirdi. Çünki Ermənistanda da dərk edirdilər ki, Şuşaya sahib olan bütövlükdə Qarabağa sahibdir. Azərbaycanın hərbi sahədə qazandığı qələbələr, xüsusilə Şuşanın düşmən əsarətindən qurtarılması müharibənin taleyində həlledici rol oynadı. Ermənistanın öz məğlubiyyətini etiraf etməsi və kapitulyasiyası ilə nəticələndi, Ermənistanı Kəlbəcər, Ağdam və Laçın rayonlarını Azərbaycana qaytarmağa məcbur etdi. Şanlı Azərbaycan Ordusu Ali Baş komandanın tapşırığını qətiyyətlə yerinə yetirərək, alınmaz qalanı-Şuşanı əlbəyaxa döyüşlərlə azad etdi. Şuşanı azad edərkən Azərbaycan əsgər və zabiti qəhrəmanlıq, peşəkarlıq, fiziki güc, yüksək milli ruh göstərdi.

"İki ildir, Azərbaycan bayrağı Qarabağın döyünən ürəyində - Şuşada dalğalanır. Şuşa bu gün layiq olduğu yerdədir, öz sahiblərini qarşılayır. Müzəffər Ali Baş Komandan İlham Əliyevin də bəyan etdiyi kimi, biz Şuşanı dirçəldirik. Təsadüfi deyil ki, Prezidentin işğaldan azad olunmuş ərazilərdə ilk xüsusi nümayəndəsi məhz Şuşa rayonuna təyin edildi. Şəhərdə Azərbaycanın mədəniyyət paytaxtı kimi bütün ənənələr bərpa olunmaqdadır. Xarıbülbül festivalı, Vaqif poeziya günləri, ziyalılarımızın ev muzeylərinin, dini-mədəni abidələrin bərpası, güllələnmiş heykəllərin doğma torpağa aparılması, bir sözlə Şuşa tarixi Azərbaycan şəhəri kimi yenidən öz imicini bərpa edir. Mədəniyyət paytaxtı olmaqla yanaşı, həm də beyin mərkəzinə çevrilməkdədir. Beyin mərkəzlərinin nümayəndələrinin toplaşdığı məkan kimi qlobal trendlərin, yeni çağırışların müzakirə olunduğu beynəlxalq platformalara ev sahibliyi edir. Bu gün Şuşada idarəetmənin və hüquqi tənzimləmənin daha da təkmilləşdirilməsi şəhərdə tarixi-mədəni irsin bərpasına və qorunub-saxlanmasına xidmət etməklə yanaşı, onun hərtərəfli inkişafına da şərait yaradır. “Şuşa İli” çərçivəsində həyata keçirilən tədbirlər isə mədəniyyət paytaxtımızın inkişafına və nüfuzunun daha da artmasına zəmin yaradır", - deyə Könül Nurullayeva vurğulayıb.