Doktor Bharat Thakur: Azərbaycanda hiss etdiyim enerji çox yaradıcıdır MÜSAHİBƏ
Bakı, 8 may, Anara Axundova, AZƏRTAC
Bu günlərdə Azərbaycanda II Beynəlxalq Yoqa Festivalı – “Nine Senses Fest – 2025” başa çatıb. Festival Heydər Əliyev Fondunun vitse-prezidenti, “Nine Senses” İncəsənət Mərkəzinin təsisçisi, Azərbaycan Yoqa Federasiyasının prezidenti Leyla Əliyevanın təşəbbüsü və dəstəyi ilə keçirilib.
Üç gün ərzində festivalın keçirildiyi məkanlarda müxtəlif istiqamətlər üzrə mühazirələr və seminarlar keçirilib. “Nine Senses Fest – 2025”də həm yerli, həm də tədbir üçün xüsusi olaraq Azərbaycana gələn xarici qonaqlar iştirak ediblər.
AZƏRTAC-ın müxbiri II Beynəlxalq Yoqa Festivalının iştirakçısı, müxtəlif ənənələrdə dərin biliyə malik yoqa ustası, rəssam, humanist, mənəvi təlimçi və meditasiya ustası doktor Bharat Thakur ilə söhbət edib.
- Azərbaycanda özünü necə hiss edirsiniz?
- Azərbaycana əvvəllər də səfər etmişəm, altı il öncə burada olmuşam. Çox gözəl ölkədir, mən tez-tez səyahət edirəm və bunu əminliklə deyə bilərəm. İçərişəhər mənim ən çox sevdiyim məkandır. Bakıda olsam, hər gün orada gəzərəm. Mən Azərbaycan kəndlərində də olmuşam, onlar inanılmaz dərəcədə gözəldir!
- Sizcə, Azərbaycan torpağının hər hansı xüsusi enerjisi varmı?
- Enerji dedikdə, onun müxtəlif formalarda olduğunu anlamaq lazımdır. Adətən dünyadakı enerji qarışdırılır: çox vaxt yaradılış və məhvetmə enerjisi eyni sikkənin iki üzü olur. Azərbaycanda hiss etdiyim enerji çox yaradıcıdır. Mən çox ilham alıram: burada olduğum müddətdə rəsm çəkmək istəyirəm, hər dəfə şeir yazıram. Beləliklə, burada enerji çox müsbətdir!
- Bu il məxsusi olaraq yoqa festivalına gəldiniz. Təəssüratınız necədir? Sizcə, belə festivalların keçirilməsi niyə vacibdir?
- Belə festivalların keçirilməsi gözəl təşəbbüsdür. Düşünürəm ki, bu, insanları müxtəlif təcrübələrlə tanış etməyin ən yaxşı yoludur. Bu qədər insanı bir yerdə görmək çox xoş idi. Mən onlara yemək hazırladım! Yemək bişirməyi çox sevirəm.
Belə festivallar ona görə vacibdir ki, ilk növbədə, onlar təkcə fiziki deyil, həm də ruhi sağlamlıqla bağlıdır. Ətrafda məlumatların çox olduğu bu günlərdə diqqətimiz dağınıqdır. Ruhumuz isə yavaş-yavaş enerjisini itirir, insanlar depressiyaya düşürlər... İnsanların xarici aləmlə əlaqə saxlaması çətinləşir. Yoqa kimi fiziki fəaliyyət insanları hərəkətə gətirir. Bədəninizi və zehninizi məşğul etsəniz, bu, sizi rəqəmsal dünyadan çox tez ayırar və bir insan kimi hissiyyat yoluna qaytarar.
Yoqa bütün dünyada niyə bu qədər populyarlaşıb?
- İstənilən fiziki fəaliyyət faydalıdır. Amma yoqa nəfəs, mudra, kriya və sairə kimi xüsusi komponentlərə malikdir. Öz-özünə təkamül məhz yoqa vasitəsilə baş verir. Bu növ təkamül üçün heç bir məhdudiyyət yoxdur - siz sonsuz inkişaf edə bilərsiniz. Eyni zamanda, yoqa bir din deyil, mənəvi təcrübədir. Din bizə nə etməməli olduğumuzu deyir. Ruhi təcrübə isə sizə nə edəcəyinizi söyləyir. Yoqa şəfadır: ağrınız varsa, o zaman müəyyən məşqlər edə bilərsiniz və bu, sizə kömək edəcək. Yaxud insanın daxili orqanlarında problemlər varsa, yoqa da şəfa verə bilər. Yoqa insanın öz daxilində apardığı bir tədqiqatdır. Dediyim kimi, yoqa həm bədənə, həm də zehnə təsir edir, eyni zamanda, müsbət əhvali-ruhiyyə, pozitiv düşüncə tərzi verir. Yoqa çox dərin təcrübədir, bu, qədim bilikdir. Artıq 10 min ildir ki, mövcuddur, yaxşı olmasaydı, onda yox olardı.
Bölmənin digər xəbərləri
