Dubayda Xocalı soyqırımına həsr olunmuş konfrans keçirilmişdir
Bakı, 24 fevral (AZƏRTAC). Birləşmiş Ərəb Əmirliklərində (BƏƏ) fəaliyyət göstərən “Azərbaycan” Cəmiyyətinin təşkilatçılığı ilə Dubayda Xocalı soyqırımının 20-ci ildönümünə həsr olunmuş konfrans keçirilmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, konfransda BƏƏ-də yaşayan azərbaycanlılar, yerli ictimaiyyət nümayəndələri, türk, İraq türkmənləri və KİV təmsilçiləri iştirak etmişlər.
“Azərbaycan” Cəmiyyətinin sədri Samir İmanov tədbir iştirakçılarına Xocalı soyqırımı haqqında ətraflı məlumat vermişdir. Bildirilmişdir ki, dəhşətli vəhşiliklər Xocalı əhalisinin başına yalnız azərbaycanlı olduqları üçün gətirilmişdir. Cəmiyyət sədri erməni vandallarının 20 il əvvəl Xocalıda törətdikləri qəddarlıqları sübuta yetirən çoxlu sayda fakt və dəlillərin olduğunu qeyd etmişdir. O, beynəlxalq aləmin Xocalı soyqırımına hüquqi və siyasi qiymət verilməsinin və bu qətliamın bəşəriyyətə qarşı törədilmiş cinayət kimi tanıdılmasının zəruriliyini vurğulamışdır.
Tədbir iştirakçıları “Xocalı soyqırımı” filminə baxmış, konfrans zalının foyesində təşkil olunmuş fotoşəkillərdən, Diasporla İş üzrə Dövlət Komitəsinin təqdim etdiyi kitab və jurnallardan ibarət sərgi ilə tanış olmuşlar. Tədbir iştirakçılarına kitablar paylanılmışdır.
Dubay Hökuməti aparatının İctimai və Mədəni məsələlər üzrə müşaviri Səid Əl-Nəccara Ermənistan-Azərbaycan, Dağlıq Qarabağ münaqişəsi və Xocalı soyqırımından bəhs edən kitablarla yanaşı Erik Fayqlın ingilis dilində “İpək Yolu Odlar Yurdundan keçərək - Azərbaycan tarixi” kitabı hədiyyə edilmişdir.
Dubay əmirliyinin rəsmi ərəbdilli nəşri “Al-Bayan” qəzetində konfrans barədə məqalə çap edilmişdir. “BƏƏ-nin Azərbaycan diasporu Xocalı soyqırımının ildönümünü yad edir” başlıqlı məqalədə qeyd edilmişdir ki, 1992-ci il fevralın 25-dən 26-na keçən gecə Ermənistan silahlı qüvvələri Xocalı şəhərinə hücum edərək azərbaycanlılara qarşı soyqırımı törətmişlər. Dinc əhaliyə amansızlıqla divan tutulmuş, 613 nəfər, o cümlədən 106 qadın, 63 uşaq və 70 ahıl insan xüsusi qəddarlıqla qətlə yetirilmiş, meyitlər təhqir olunmuş, 487 dinc sakin ağır yaralanmış, 1275 nəfər girov götürülmüşdür. Girovların 150 nəfərinin taleyi bu günədək məlum deyildir.
Məqalə müəllifi S.İmanovun konfransda çıxışına istinad edərək qeyd etmişdir ki, Ermənistan ordusunun təcavüzü nəticəsində şəhər tamamilə dağıdılmış və bir gecə ərzində yer üzündən silinmişdir. Cəmiyyət sədrinin “Beynəlxalq İnsan Haqları üzrə Komitə bu soyqırımı dünyada baş vermiş milli münaqişələr tarixinin ən böyük qırğını kimi təsdiq etmişdir”, dediyi fikirlər də yazıda yer almışdır.
Müəllif Xocalı soyqırımı həqiqətlərinin araşdırılaraq dünyaya tanıdılmasında Azərbaycan xalqının ümummilli lideri Heydər Əliyevin misilsiz xidmətlərindən bəhs etmişdir. Bildirilmişdir ki, ulu öndərin təşəbbüsü ilə 1994-cü il fevralın 24-də Azərbaycan Respublikasının Milli Məclisi “Xocalı Soyqırımı Günü haqqında” qərar qəbul etmişdir. Məqalədə S.İmanovun son 20 ildə Xocalı soyqırımına dünya ictimaiyyətinin siyasi-hüquqi qiymət verməsi istiqamətində çox işlərin görüldüyü barədə fikirlərinə də toxunulmuşdur. Xocalıda həyata keçirilən cinayətlə bağlı bir çox beynəlxalq təşkilatlara xüsusi materialların təqdim edildiyi bildirmişdir. Yazıda Xocalı faciəsini özündə əks etdirən müxtəlif dillərdə kitab və bülletenlərin yayıldığı da qeyd etmişdir.
Bölmənin digər xəbərləri
