Dulusçuluq həm səbir, həm də yaradıcılıq tələb edən sənətdir
Şəki, 3 dekabr, Gülay Nəzərova, AZƏRTAC
Şəki zəngin mədəni irsi və əl sənətləri ilə tanınan şəhərlərimizdən biridir. Burada dulusçuluq əsrlər boyu inkişaf edib və nəsildən-nəslə ötürülən bir sənət kimi qorunub saxlanılır. Dulusçuların hazırladığı ənənəvi qablar -piti qablardan qatıq qablara, böyük qazanlara qədər - həm gündəlik həyatın, həm də mətbəx mədəniyyətinin ayrılmaz hissəsidir. Bu sənət xüsusi torpaq, əl zəhməti və mərhələli hazırlıq prosesi tələb edir.
AZƏRTAC-ın müxbiri bu sənətlə məşğul olan Şəki dulusçularından Rəhman Məmmədov və Şöyüb Məmmədovla həmsöhbət olub. Sənətkarlar həm iş prosesindən, həm də bu sənətin nəsildən-nəslə ötürülən ənənələrindən danışıb.
Rəhman Məmmədov dulusçuluqla 15 ildir məşğul olduğunu bildirib. Onun sözlərinə görə, bu sənət nəsildən-nəslə ötürülən qiymətli irsdir: "Bu sənəti atamdan öyrənmişəm, atam isə öz atasından. Yəni nəsildən-nəslə keçən bir sənətdir. Fəxr edirəm ki, bu işi davam etdirirəm. Çox gözəl sənətdir. İnşallah gələcəkdə övladlarıma da öyrədəcəyəm”.
O, qabların hazırlanma prosesini belə izah edir: "Proses çox çətindir. Hər qabın öz mərhələsi var. Hazırda işlədiyim bir nəfərlik piti qabıdır. Əvvəl formasını veririk, sabah qulpunu vururuq. Sonra qab qurudulur, bir neçə gün ərzində bişirilir. Başqa su qabları, böyük qazanlar da düzəldirik, amma əsasən piti qabı işləyirik".
Sənətkar əlavə edib ki, bu sənət həm incə əl işi, həm də səbir və peşəkarlıq tələb edir. Hər qab, hər detal ustadın zəhmətinin və nəsildən gələn biliklərin nəticəsidir.
Dulusçu Şöyüb Məmmədov artıq 6-cı nəsildir ki, bu sənətlə məşğuldur. O, əsasən güldanlar düzəldir, həmçinin müxtəlif su qabları da hazırlayır. Onun sözlərinə görə, dulusçuluq prosesi çox mərhələlidir və hər bir qabın öz spesifik mərhələsi və qaydası var.
Şöyüb Məmmədovun bu sənətə marağı uşaqlıqdan başlayıb. O, bu sənətin yalnız texnika və qab hazırlamaqdan ibarət olmadığını, eyni zamanda tarix, mədəniyyət və nəsildən-nəslə ötürülən ənənələrin daşıyıcısı olduğunu bildirib. Onun sözlərinə görə, hər bir qabda ustadın zəhməti, diqqəti və yaradıcılığı əks olunur.
Ümumilikdə, Şəki dulusçuluğu şəhərin zəngin mədəni irsinin ayrılmaz hissəsi kimi qorunub saxlanılır. Bu sənətlə məşğul olan ustalar, o cümlədən Şöyüb Məmmədov və Rəhman Məmmədov, hər bir qabı böyük diqqət və zəhmətlə hazırlayır. Sənətkarların da dediyi kimi, dulusçuluq həm səbir, həm də yaradıcılıq tələb edən bir sənətdir.
Beləliklə, Şəki dulusçuluğu həm qədim ənənələri yaşadır, həm də gələcək nəsillər üçün mədəni irsi qoruyur.
Bölmənin digər xəbərləri
