Dünya Azərbaycanlılarının Həmrəyliyi Günü Niderlandda qeyd edilib
Bakı, 26 dekabr, AZƏRTAC
Azərbaycanın Niderlanddakı səfirliyi Dünya Azərbaycanlılarının Həmrəyliyi Günü və Yeni il münasibətilə tədbir təşkil edib.
Səfirlikdən AZƏRTAC-a bildiriblər ki, tədbir çərçivəsində Niderland ictimaiyyətinin təmsilçiləri tərəfindən təsis edilmiş “Niderland-Azərbaycan Əməkdaşlıq Platforması”nın (NACP) təqdimatı olub.
Platformanın prezidenti Arnold Utama çıxış edərək NACP-ın iki ölkə arasında iqtisadi, sosial, humanitar və s. sahələrdə əməkdaşlığı əhatə etdiyini bildirib. Qeyd edib ki, Platforma bu istiqamətlər üzrə əməkdaşlıq etmək niyyətində olan şəxsləri və qrupları bir araya gətirəcək. NACP, eyni zamanda, Dağlıq Qarabağ münaqişəsi ilə bağlı həqiqətlərin, Azərbaycanın tarixinə, mədəniyyətinə dair məlumatların Niderland ictimaiyyətinə çatdırılması işində mühüm rol oynayacaq.
Tədbir çərçivəsində səfir Mir-Həmzə Efendiyevin, NACP, Benilüks Azərbaycanlıları Konqresi, Azərbaycan-Türk Kültür Dərnəyi, Azərbaycanın Holland Dostları Proqramı və digər diaspor təşkilatları rəhbərlərinin iştirakı ilə “dəyirmi masa”lar keçirilib.
Səfir M.Efendiyev ümummilli lider Heydər Əliyev tərəfindən təsis edilən Dünya Azərbaycanlılarının Həmrəyliyi Gününün tarixçəsindən, Prezident İlham Əliyevin bu əlamətdar günə verdiyi önəmdən söz açıb. Səfir dövlət başçısının hər il dünya azərbaycanlılarına müraciətlərindən irəli gələn müddəaların icrasının vacibliyini vurğulayıb. Bununla əlaqədar tərəflər Niderlandda yaşayan azərbaycanlıların təşkilatlanması, cəmiyyətə inteqrasiyası və milli maraqlarımızın müdafiəsinə cəlb olunması, soydaşlarımızın ictimai-siyasi həyatda iştirak səviyyəsinin artırılması, həmvətənlər arasında birliyin təmin olunması istiqamətində görülən işlərin növbəti ildə daha da effektiv əlaqələndirilməsi məsələləri ətrafında fikir mübadiləsi aparıblar.
2014-cü ilin Azərbaycan və Niderland arasında əməkdaşlıq baxımından uğurlu il olduğunu qeyd edən diplomat yüksək səviyyəli rəsmilərin görüşlərini və qarşılıqlı səfərlərini, müxtəlif sahələri əhatə edən çoxsaylı tədbirləri və biznes forumları xatırladıb, bütün bunların əməkdaşlığın inkişafının bariz nümunəsi olduğunu və onun daha da genişləndirilməsi üçün zəmin yaratdığını bildirib.
Qeyd edilib ki, görülən işlərin nəticəsində ölkəmizdə qeyri-neft sektoruna yatırılmış birbaşa investisiyaların 9,1 faizi, yəni 668 milyon dolları Niderland sərmayəçilərinin payına düşür. Bu göstərici üzrə Niderland Türkiyə, Böyük Britaniya və ABŞ-dan sonra 4-cü yeri tutur. Təkcə 2013-cü ildə Niderland şirkətləri tərəfindən ölkəmizdə 73,2 milyon dollar investisiya yatırılıb. 110-a yaxın Niderland şirkəti Azərbaycanda müxtəlif sahələrdə uğurla fəaliyyət göstərir.
Daha sonra Azərbaycan və holland bəstəkarlarının əsərlərindən ibarət konsert olub, səfirlik tərəfindən ziyafət verilib.
Bölmənin digər xəbərləri
