DÜNYA BANKININ DAHA BİR LAYİHƏSİNİN HƏYATA KEÇİRİLMƏSİ BAŞA ÇATMAQDADIR
Dünya Bankının Azərbaycanda təhsil sisteminin islahatlarına yardım göstərilməsi layihəsinin həyata keçirilməsi ilin sonunadək başa çatdırılacaqdır.
Dünya Bankının Bakı ofisindən AZƏRTAC-a daxil olmuş məlumata görə, layihənin həyata keçirilməsinə 1999-cu ilin sentyabrında, Bankın dörd bölməsindən birinin - Beynəlxalq İnkişaf Assosiasiyasının (BİA) rəhbərliyi bu məqsəd üçün 5 milyon dollar ayrılması haqqında qərar qəbul etdikdən sonra başlanmışdır. Xatırladaq ki, BİA-nın kreditləri faizsizdir, illik rüsumun həcmi 0,75 faizdir və çox uzun müddətə - 35-40 ilə verilir.
Kreditin 3,2 milyon dollar məbləğində olan əsas hissəsi təcrübi məktəblər yaradılmasına və müəllimlərin təliminə xərclənmişdir. Bu cür məktəblər Bakı, Sumqayıt, Gəncə və Lənkəran şəhərlərində yaradılmışdır. Layihənin digər mühüm hissəsinin - tədris proqramlarının təkmilləşdirilməsinin həyata keçirilməsinə 1,2 milyon dollar ayrılmışdır.
Layihənin gerçəkləşdirilməsi zamanı keçirilmiş monitorinqin nəticələrinə əsasən, BİA-nın mütəxəssisləri təhsil sistemində islahatları yüksək qiymətləndirmişlər.
Bölmənin digər xəbərləri
