İQTİSADİYYAT
DÜNYA BANKININ MALİYYƏLƏŞDİRDİYİ LAYİHƏLƏR
Azərbaycanda Dünya Bankı (DB) tərəfindən maliyyələşdirilən 18 layihə həyata keçirilir. Onların üçü tamamilə başa çatmış, on beşi isə gerçəkləşmə mərhələsindədir. Bunu AZƏRTAC-a DB-nın Bakıdakı nümayəndəliyindən bildirmişlər.
Layihələrin həyata keçirilməsi üçün ölkəmizə 530 milyon dollar kredit verilmişdir. Həmin məbləğin xeyli hissəsi paytaxtın su təchizatının bərpasına, bölgələrdə suvarma sisteminin inkişafına, avtomobil yollarının tikintisinə, qaz təsərrüfatının bərpasına yönəldilmişdir.
Xatırladaq ki, Dünya Bankının ayırdığı kreditlər güzəştli kreditlərdir. Hazırda Beynəlxalq Yenidənqurma və İnkişaf Bankının xətti ilə respublikaya yeni kredit ayrılması layihəsi hazırlanır. Bu bank adambaşına illik gəlir 800 dollaradək təşkil etdiyi ölkələrə kredit verir. Bu ilin 11 ayı ərzində Azərbaycanda həmin göstərici 570 dollar təşkil etmişdir.