Düşənbədə də Xocalı faciəsi qurbanlarının xatirəsi anılacaqdır
Düşənbə, 19 fevral (AZƏRTAC). Fevralın 24-də Azərbaycanın Tacikistandakı səfirliyində Xocalı soyqırımının 19-cu ildönümü ilə əlaqədar anma mərasimi keçiriləcəkdir.
Mərasimdə Düşənbədə akkreditə olunmuş səfirlik və beynəlxalq nümayəndəliklərinin təmsilçiləri, diasporumuzun üzvləri, jurnalistlər iştirak edəcəklər.
Səfirliyin müşaviri İlham Zamanov bildirmişdir ki, anma mərasimində səfir Məhərrəm Əliyev Xocalı faciəsi, eləcə də Ermənistan-Azərbaycan, Dağlıq Qarabağ münaqişəsinin sülh yolu ilə həllində ölkəmizin səyləri haqqına ətraflı məlumat verəcəkdir.
Bundan əlavə, tədbirdə səfirlik tərəfindən tacik, rus və ingilis dillərində hazırlanmış “Xocalıya ədalət zəfər çalacaq - tarixin məhkəməsi qaçılmazdır” kitabçanın təqdimat mərasimi də keçiriləcəkdir.
İştirakçılara Xocalı soyqırımı haqqında Azərbaycan, rus, ingilis və alman dillərində disk, həmçinin məlumatlar paylanacaqdır.
Artıq Tacikistanın Xarici İşlər Nazirliyi və digər dövlət qurumlarına, Düşənbədəki səfirliklərə, beynəlxalq təşkilatlara, KİV-lərə Xocalı faciəsi haqqında kitab və broşürlər və digər məlumatlar göndərilmişdir.
Qulu Kəngərli
AZƏRTAC-ın xüsusi müxbiri
Düşənbə
Bölmənin digər xəbərləri
