Əbu-Dabi görüşünün ikitərəfli formatda keçirilməsi Azərbaycanın prinsipial mövqeyinin təzahürüdür – RƏY
Bakı, 12 iyul, AZƏRTAC
Azərbaycan Prezidenti ilə Ermənistan Baş nazirinin Əbu-Dabidəki müzakirələri çox zamanında həyata keçirilmiş bir görüş oldu. Çünki dünya və bölgəmiz çox kritik bir dönəmdən keçir. İndiyədək regionumuza böyük təsiri olan, müxtəlif problemlər yaradaraq aranı qarışdırmağa çalışan ölkə və qüvvələrin bölgəyə təsiri azalıb. Yəni, Rusiya-Ukrayna, İran–İsrail müharibəsi, Avropa İttifaqı ölkələrinin başlarının öz “dərdləri”nə qarışması, ABŞ-da ikinci dəfə hakimiyyətə gələn Donald Trampın Azərbaycan–Ermənistan münasibətlərinə daha əvvəlki hökumət kimi ikiüzlü və təxribatçı yanaşma sərgiləməməsi, qardaş Türkiyənin beynəlxalq gücə çevrilmə prosesi, dövlətimizin öz imkanlarını və əlaqələrini genişləndirməsi, regionda və dünyada oynadığı rol Cənubi Qafqaz, o cümlədən Azərbaycan-Ermənistan sülh danışıqları üçün əlverişli imkanlar yaradıb. Əbu-Dabi görüşü də bu reallığın təzahürüdür.
Bu sözləri AZƏRTAC-a açıqlamasında politoloq Yalçın Hacızadə söyləyib.
Politoloq qeyd edib ki, Əbu-Dabidəki görüşün ikitərəfli formatda keçirilməsi Azərbaycanın prinsipial mövqeyinin nəticəsidir. Bu, dövlətimizin və Prezident İlham Əliyevin vasitəçisiz, birbaşa dialoq çərçivəsində üçüncü tərəflərin iştirakı olmadan regional məsələlərin daha effektiv və daha real həll oluna biləcəyinə inamını nümayiş etdirir. Qarabağ Zəfərindən sonra biz qarşı tərəfə dərhal sülh təklifləri göndərərək ilk addımı atmış olduq. Lakin işğal dövründə olduğu kimi, bəzi qüvvələr yenə də sülh danışıqlarını inhisarına alaraq, öz maraqlarının təmin olunması üçün yeni oyunlar oynamaq istədilər. Amma Prezident İlham Əliyevin rəhbərliyi ilə Azərbaycan dövlətinin atdığı siyasi addımlar həmin ikiüzlü, sülhdən danışıb ancaq sülhün olmaması üçün siyasət yürüdən ölkələrə böyük dərs oldu. Bu gün həmin qüvvələr zərərsizləşdirildikləri üçün ortada yoxdurlar. Yəni, sülh prosesinə əngəl olmaq, həmçinin regionda münaqişənin, separatizmin qalmasını istəyən qüvvələr hazırda əks nəticəyə şahidlik edirlər.
“Görüşün beş saat davam etməsi də məhsuldarlığın, gələcəkdə sülh razılaşmasının imzalanması üçün bütün detalların müzakirə olunduğunu göstərir. Əlbəttə, müzakirə olunan məsələlərin əsas siyasi xəttini Azərbaycanın müəyyənləşdirdiyi – sərhədlərin delimitasiyası və demarkasiyası, Ermənistan konstitusiyasına dəyişikliklərin edilməsi, Minsk qrupunun buraxılması və Zəngəzur dəhlizinin açılması kimi tələblər təşkil edib. Azərbaycanın Qarabağ Zəfəri və ondan sonra həyata keçirdiyi siyasət təkcə ölkəmiz üçün deyil, regionda sülhün, təhlükəsizliyin, əməkdaşlığın qurulmasına və möhkəmlənməsinə xidmət edir. Yəni, bizim həyata keçirdiyimiz siyasət elə Ermənistanın da müstəqilləşməsinə, forpost statusundan qurtulmasına yol açır. Eyni zamanda, Azərbaycan bu tələblərlə sülh danışıqlarında təkcə hakimiyyətlərin deyil, xalqların da rol oynamasını istəyir. Bununla da sülh razılaşmasını, sadəcə, kağız parçası deyil, dövlətlərin və xalqların iradəsinin əksi olaraq görmək istəyir. Çünki Ermənistanda indi olduğu kimi, hər zaman hakimiyyət uğrunda savaş gedir və bu gün hakimiyyətdə olan qüvvənin sabah olmayacağı bizə çox aydın məsələdir”, - deyə Y.Hacızadə vurğulayıb.
Onun sözlərinə görə, görüşdə müzakirə edilən əsas məsələlərdən biri Zəngəzur dəhlizinin açılması ilə bağlı olub. Bu dəhliz təkcə ölkəmizin deyil, bütün regionun inkişafı üçün strateji əhəmiyyət daşıyır. Kənar təzyiqlərə baxmayaraq, dövlətimizin bu məsələdə də sərgilədiyi qəti mövqe onu göstərir ki, Azərbaycan diplomatik imkanlarına güvənir və manipulyasiyalara açıq olmayan sülh istəyir. İndi Uzaq Şərqin, Türküstan bölgəsinin (Orta Asiyanın) Qərbə və ya əks istiqamətdə təhlükəsiz və qısa vaxt ərzində hərəkəti Orta Dəhliz vasitəsilə aparılır. Zəngəzur dəhlizinin açılması da Orta Dəhlizin davamı olaraq bu əlaqələri və ticarəti daha da artıracaq. Ermənistanın Baş naziri Nikol Paşinyanın Türkiyəyə səfəri və son zamanlar atdığı digər belə addımlar, səsləndirdiyi fikirlər regionda yaranmış vəziyyəti qəbul etdiyini, Azərbaycanın təkliflərinin Ermənistana da fayda verəcəyini anladığını göstərir. Yəni, hesab edirəm ki, Ermənistan onun üçün Türk dünyasını bölmək məqsədilə hazırlanmış 200 illik siyasətdən üz döndərərək Zəngəzur dəhlizinin açılması reallığını qəbul etmək məcburiyyətində qalacaq.
Politoloq əlavə edib ki, bu görüş sülh müqaviləsinin imzalanması baxımından xüsusi əhəmiyyət daşıyır, sülhə aparılan yolun ən real addımı kimi görünür. Ölkəmizin konstruktiv və sülhsevər siyasəti, bu addımlara Ermənistan tərəfinin də müsbət yanaşması regionda uzunmüddətli sabitliyin və əməkdaşlığın təmin olunmasına ümidləri artırır. Ermənistanın Baş naziri Nikol Paşinyanın konkret öhdəlik götürməsi və konstitusiya dəyişikliyi ilə bağlı verəcəyi qərar prosesin taleyini müəyyənləşdirəcək.
Bölmənin digər xəbərləri
