“Ecazkar heyvanlar yanında” uşaq ekologiya düşərgəsi

08.09.2014 [18:39]
Çap et
A⁺ A^-

Bakı, 8 sentyabr (AZƏRTAC). UNESCO üzrə Azərbaycan Respublikasının Milli Komissiyası və “EkoSfera” Sosial-Ekoloji Mərkəzin birgə layihəsi çərçivəsində sentyabrın 5-dən 7-dək gənc ekoloqlar üçün “Ecazkar heyvanlar yanında” uşaq ekologiya düşərgəsi təşkil edilib. Düşərgə Azərbaycan Respublikası Dövlət Neft Şirkətinin (ARDNŞ) Ekologiya İdarəsinin, şirkətin Eko-parkının və Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinin dəstəyi ilə həyata keçirilib.

UNESCO üzrə Azərbaycan Respublikasının Milli Komissiyasından AZƏRTAC-a bildiriblər ki, 10-13 yaş arası 35 uşaq üçün nəzərdə tutulmuş proqrama xüsusi əyani dərslər və heyvanların müşahidəsi, herbari materiallarının toplanması, qruplarla iş, yaradıcı seminarlar və sahə elmi-tədqiqat laboratoriyası daxil edilib.

Düşərgə Qala Etno-Ekoloji Mərkəzin və “Qala” Dövlət Tarix-Etnoqrafiya Qoruğunun ərazisində keçirilib. Ekspert qismində “EkoSfera” Mərkəzinin aparıcı mütəxəssisləri, Bakı Dövlət Universiteti “Ekologiya və torpaqşünaslıq” fakültəsi “Bioekologiya” kafedrasının müəllimləri, Azərbaycan Milli Elmlər Akademiyası Zoologiya İnstitutunun elmi əməkdaşları iştirak ediblər.

Uşaqlar ilbizlərin, arıların, qurbağaların, kərtənkələlərin, ilanların və yarasaların həyat tərzini izləyiblər.