Əcnəbilərin hüquqlarının qorunması Azərbaycan dövlətinin diqqətindədir
Bakı, 16 dekabr, AZƏRTAC
Dövlət Miqrasiya Xidməti (DMX) və Miqrasiya Siyasətinin İnkişafı üzrə Beynəlxalq Mərkəzin Azərbaycandakı nümayəndəliyinin birgə təşkilatçılığı ilə 18 Dekabr - Beynəlxalq Miqrant Günü münasibətilə “Azərbaycanda miqrantlar: bərabərlik, müxtəliflik və inklüzivlik” mövzusuna həsr olunmuş tədbir keçirilib.
AZƏRTAC xəbər verir ki, tədbirdə DMX-nin rəhbər heyəti və əməkdaşları, miqrasiya sahəsində fəaliyyət göstərən beynəlxalq təşkilatların, dövlət orqanlarının, vətəndaş cəmiyyəti institutlarının, özəl sektorun, xarici ölkələrin ölkəmizdəki diplomatik nümayəndəliklərinin rəhbər şəxsləri, eləcə də miqrantlar iştirak ediblər.
Tədbir iştirakçıları əvvəlcə ölkəmizdə mədəni müxtəlifliyi tərənnüm etdirən mənşə ölkələrinin mədəni irs, məişət və kulinariya nümunələrindən ibarət sərgi, eləcə də “Azərbaycanda miqrasiya sizin obyektivdə” adlı foto müsabiqənin iştirakçılarının fərdi və fərqli baxış bucaqlarından çəkdikləri şəkillərlə tanış olublar.
DMX-nin rəisi Vüsal Hüseynov çıxış edərək yerli və beynəlxalq tərəfdaşlarla birgə dövrümüzün əsas qlobal məsələlərindən biri olan miqrasiyanın müxtəlif aspektlərinə diqqətin yönəldilməsi məqsədilə hər il ənənəvi olaraq qeyd edilən Beynəlxalq Miqrant Gününün əhəmiyyətinə toxunub. Bildirib ki, əcnəbilərin və vətəndaşlığı olmayan şəxslərin, əməkçi miqrantların, o cümlədən qaçqınların hüquqlarının qorunması, inteqrasiya yolu ilə cəmiyyətin inkişaf prosesinə cəlb edilməsi məsələləri hər zaman Azərbaycan dövlətinin diqqətindədir.
Xidmət rəisi müxtəlif dinlərin və xalqların nümayəndələrinin birlikdə sülh şəraitində yaşadığı ölkəmizdə miqrasiyanın idarə edilməsi, miqrantların cəmiyyətə inteqrasiyası, onların rifahı, hüquq və azadlıqlarının müdafiəsi istiqamətində Dövlət Miqrasiya Xidmətinin həyata keçirdiyi tədbirləri diqqətə çatdırıb. Tədbirin bərabərliyin, müxtəlifliyin və inklüzivliyin təşviqi ilə miqrantların cəmiyyətə səmərəli inteqrasiyasına, onların hüquqlarının müdafiəsinə diqqətin artırılmasına, eləcə də miqrasiya sahəsində yerli və beynəlxalq təşkilatlarla əməkdaşlığın daha da dərinləşməsinə mühüm töhfə verəcəyinə əminliyini ifadə edib.
Tədbirdə BMT-nin Azərbaycandakı rezident-əlaqələndiricisi Vladanka Andreyeva, Azərbaycanın İnsan Hüquqları üzrə Müvəkkili (Ombudsman) Səbinə Əliyeva, Avropa İttifaqının Azərbaycandakı nümayəndəliyinin rəhbər müavini Zoltan Szalai, Miqrasiya Siyasətinin İnkişafı üzrə Beynəlxalq Mərkəzin Şərqi Avropa və Mərkəzi Asiya Regionunun rəhbəri Radim Jak, BMqT-nin Azərbaycandakı Nümayəndəliyinin rəhbəri Vladimir Qyorqyev çıxış edərək ölkəmizdə miqrantlara göstərilən xoş münasibət, onların hüquqlarının təmini vəziyyəti, yaşadıqları cəmiyyətlərə töhfələrinin artırılmasına yönəlmiş birgə layihələr barədə məlumat veriblər, bu istiqamətdə səmərəli və uzunmuddətli faydalı əməkdaşlıq əlaqələrindən məmnunluqlarını ifadə ediblər.
Sonra Azərbaycanda uzun illər yaşayan bir miqrantın həyat hekayəsinin, ölkəmizlə bağlı düşüncələrinin ekranlaşdırıldığı “48: Azərbaycana sonsuz sevgi ilə” adlı qısametrajlı film nümayiş olunub.
Daha sonra DMX tərəfindən Miqrasiya Siyasətinin İnkişafı üzrə Beynəlxalq Mərkəzin Azərbaycandakı nümayəndəliyi ilə birgə keçirilən, münsiflər heyətində dünyaşöhrətli fotoqraf Reza Deqatinin də təmsil olunduğu “Azərbaycanda miqrasiya sizin obyektivdə” adlı fotomüsabiqənin qalibləri mükafatlandırılıblar. Fotomüsabiqənin yekun nəticələrinə görə AZƏRTAC-ın fotomüxbiri Azər İbrahimov həvəsləndirici yer tutub.
Bədii hissədə ölkəmizdə yaşayan, Azərbaycanın zəngin musiqi sənətindən ilhamlanan, onun bənzərsizliyini duyan, təbliğ edən əcnəbilərin ifaları dinlənilib.
Bölmənin digər xəbərləri
