Efiopiya İqlim Həftəsi başlayıb VİDEO
COP29 Sədrliyi Afrika ölkələrinə həsr olunan təqdimatla çıxış edəcək
Bakı, 4 sentyabr, AZƏRTAC
Efiopiyanın paytaxtı Əddis-Əbəbədə yerləşən Beynəlxalq Konqres Mərkəzində 2025-ci ilin ikinci ən böyük İqlim Həftəsi keçirilir. Regional və qlobal əməkdaşlığın gücləndirilməsinə həsr olunan bu həftədə yerli prioritetlərə və dayanıqlı həllərə xüsusi diqqət ayrılıb.
AZƏRTAC xəbər verir ki, daha çox Afrika üzrə müxtəlif layihələrin önə çıxarılacağı gündəlikdə Keniya – Kiçik Nəqliyyat Vasitələri üzrə “E-Mobillik”, Keniya Günəşdən Sonrakı Soyutma və Cənubi Afrika Polad layihələri yer alıb. Bu layihələr tərəfdaş təşkilatlarla birlikdə təqdim ediləcək.
COP29 Sədrliyi də İqlim Həftəsində iştirak edir. Açılış mərasimində çıxış edən COP29-un iqlim üzrə yüksəksəviyyəli çempionu Nigar Arpadarai Əddis-Əbəbədə keçirilən İqlim Həftəsinin gələcək qlobal proseslərin başlanğıcı kimi mühüm əhəmiyyət daşıdığını vurğulayıb.
“COP29 Sədrliyini bu ilin ikinci İqlim Həftəsində gözəl Əddis-Əbəbədə təmsil etmək mənim üçün böyük şərəfdir. Bu mühüm həftə Belemə aparan marafonun başlanğıcıdır. Bu gün dünya tarazsız və parçalanmış vəziyyətdədir. O, etimadsızlıq, münaqişələr və suveren eqoizmlə doludur. Bu şəraitdə COP29-da bir sıra tarixi qərarların kollektiv şəkildə qəbul edilməsi ikiqat əhəmiyyət daşıyır. Biz iqlim fəaliyyəti üçün ümidverici nəticələr vəd edən qərarlar qəbul etdik. Bizi hər kəs üçün ədalət prinsipi və ən həssas, cavab vermək imkanları zəif olan ölkələri dəstəkləmək ruhu istiqamətləndirdi. Ən çox diqqət yetirdiyimiz məsələlərdən biri COP29-un həm Qlobal Cənubun səsinin eşidildiyi, həm də COP məqsədlərinin ön planda qaldığı bir platformaya çevrilməsi oldu. COP29-da qəbul edilən Bakı Maliyyə Məqsədi inkişaf etməkdə olan ölkələrə 2035-ci ilə qədər illik ən azı 300 milyard dollar, ümumilikdə isə 1,3 trilyon dollara qədər maliyyə ayrılmasını nəzərdə tutur”, - deyə N.Arpadarai əlavə edib.
Nigar Arpadarai, həmçinin COP29-da qəbul edilən qərarların yalnız maliyyə nailiyyətləri ilə bağlı olmadığını, həm də gender, uyğunlaşma, İtki və Zərərə cavab verən Fond ilə bağlı tarixi addımları əhatə etdiyini söyləyib.
“Əminəm ki, texnoloji inkişaf Yaşıl Gündəliyin yenidən canlanmasının açarıdır. İnnovasiya insan potensialı və yeni iqtisadi imkanlarla dəstəklənməlidir, təkcə tənzimləmə və məhdudiyyətlərə əsaslanmamalıdır. Donor ölkələr üzərilərinə düşən öhdəlikləri açıq şəkildə bəyan etməli, yeni milli iqlim öhdəlikləri isə sadəcə sənəd yox, real hədəflər üzərində qurulmalıdır. COP29 Sədrliyinin İqlim Həftəsi çərçivəsində xüsusi tədbirlər təşkil etdiyini də qeyd etmək istərdim. Onlardan biri Afrikanın xüsusi ehtiyac və şəraitinə həsr olunmuş yüksəksəviyyəli tədbirdir. Bu tədbir sentyabrın 6-da məhz bu binada baş tutacaq. Bu, COP29 Sədrliyinin il ərzində Afrikanın unikal çağırışlarına diqqət çəkmək öhdəliyinə uyğun olaraq təşkil edilib”, - deyə COP29-un iqlim üzrə yüksəksəviyyəli çempionu vurğulayıb.
Xatırladaq ki, Əddis-Əbəbədə keçirilən İqlim Həftəsi COP29-un nəticələrinin praktiki icrası və qlobal ədalətli iqlim gündəliyinin davamı üçün mühüm platformadır. Həftə öz işini sentyabrın 6-da başa vuracaq.
Bölmənin digər xəbərləri
