Əhalinin pul gəlirlərinin artması bank sisteminin güclənməsinə kömək edir
Bakı, 15 mart (AZƏRTAC). Azərbaycan iqtisadiyyatının sürətli irəliləyişi buna paralel olaraq bank sisteminin inkişafını labüd edir. Bu, pul axınlarının keçiriciləri kimi təkcə milli kredit təşkilatlarının mahiyyəti ilə deyil, həm də bankların əhali də daxil olmaqla, bütün təsərrüfat subyektləri ilə institusional və işgüzar qarşılıqlı əlaqələrinin müxtəlifliyi ilə şərtlənmişdir. İqtisadiyyatın inkişafının səviyyəsi və sürəti xeyli dərəcədə bank sisteminin işindən asılıdır, çünki bu sistemin özü iqtisadiyyatın ayrılmaz hissəsidir.
Qloballaşma proseslərinin sürətlənməsi, Azərbaycanın dünya təsərrüfat əlaqələrində getdikcə genişlənən iştirakı maliyyə-pul axınlarının formalaşmasının xüsusiyyətini və güclənməsinin dönməzliyini müəyyən edir.
Qeyd etmək lazımdır ki, son illər ölkə iqtisadiyyatının inkişafı və əhalinin pul gəlirlərinin artması bank sisteminin də güclənməsinə kömək etmişdir. Statistik məlumatlar belə bir nəticəyə gəlməyə əsas verir ki, hazırda bu sahədə mühüm kəmiyyət və keyfiyyət parametrləri üzrə şəksiz tərəqqi əldə olunmuşdur. Kredit təşkilatlarının kapital bazasının güclənməsi təmin olunmuş, bank məhsulları və xidmətlərinin təklifi fəallaşmışdır. Xüsusilə, hüquqi və fiziki şəxslərin depozitlərinin ümumi məbləği artmış, onların müddətlərinin uzanması meyilləri müşahidə olunur. Azərbaycan Beynəlxalq Bankının (ABB) göstəricilərinə nəzər salmaqla bunun şahidi ola bilərik.
Ötən il ölkə əhalisi tərəfindən Azərbaycan Beynəlxalq Bankına 252 milyon manat məbləğində əmanət qoyulmuşdur. Bununla da cari ilin yanvar ayının 1-nə ABB-də əhalinin əmanətlərinin həcmi 40 faiz artaraq 968,996 milyon manat təşkil etmişdir. Bu da cəmi banklar üzrə əmanətlərin 41 faizinə bərabərdir.
Qeyd etmək lazımdır ki, 2002-ci ildə ABB-də əhalinin əmanətlərinin məbləği cəmi 50 milyon ABŞ dolları idi.
Maraqlıdır ki, manatla olan əqdlərin sayı və miqdarı əvvəlki illərə nisbətən əsaslı şəkildə artmışdır. Təkcə ötən illə müqayisədə bu meyl özünü qabarıq şəkildə büruzə verir. Belə ki, əgər 2011-ci ilin əvvəlinə əhali tərəfindən Azərbaycan Beynəlxalq Bankına qoyulan əmanətlərin məbləği 224,3 milyon manat və əqdlərin sayı 12 982 idisə, cari ilin yanvar ayının 1-nə bu rəqəm, müvafiq olaraq 320,8 milyon manat və 19 588 əqd təşkil edir. Artım tempinə görə bu seqmentdə manat ABŞ dolları və avronu xeyli üstələmişdir. Əhali tərəfindən 2011-ci il ərzində 2010-cu illə müqayisədə banka 9,1 milyon avro, 22,4 milyon ABŞ dolları az, nəhayət 96,5 milyon AZN çox əmanət qoyulmuşdur. Bu Azərbaycan vətəndaşlarının milli valyutaya inam və etibarının bariz nümunəsidir.
Azərbaycanın ən iri maliyyə-kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2 faiz təşkil edir. Ölkə üzrə çoxşaxəli xidmət şəbəkəsi ilə yanaşı, Azərbaycan Beynəlxalq Bankının Londonda, Frankturt-Maynda, Dubayda, Lüksemburqda və Nyu-Yorkda nümayəndəlikləri, Rusiya Federasiyasında və Gürcüstanda törəmə bankları, habelə törəmə strukturları - Beynəlxalq Sığorta Şirkəti, “Azərikard” prosessinq şirkəti vardır. Bankda və onun bütün bölmələrində yüksək ixtisaslı və təcrübəli heyət işləyir, müştərilərə 150-dən çox bank məhsulu və xidməti təqdim olunur.
Elmir Həbibullayev
ABB Pərakəndə Biznes Departamentinin direktoru
Bölmənin digər xəbərləri
