“Ekol Mühəndislik Xidmətləri” QSC-in beş illiyi qeyd edilmişdir
Bakı, 15 aprel (AZƏRTAC). Aprelin 15-də “Ekol Mühəndislik Xidmətləri” Qapalı Səhmdar Cəmiyyətinin (QSC) yaradılmasının 5 illiyi ilə əlaqədar silsilə tədbirlər təşkil edilmişdir.
“Ekol”dan AZƏRTAC-a verilən məlumata görə, əvvəlcə, vaxtilə Azərbaycan Respublikası Dövlət Neft Şirkətinin (ARDNŞ) balansında olmuş və 2009-cu ildən QSC-in xidməti istifadəsinə verilən Zığ qəsəbəsi, Hövsan yolu üzərində yerləşən qeyri-yaşayış sahəsinin yenidənqurmadan sonra açılışı keçirilmişdir. Tədbirdə ARDNŞ-in ekologiya üzrə vitse-prezidenti Rəfiqə Hüseynzadə, şirkətin idarə rəisləri, zavod direktorları, ekologiya üzrə aparıcı mütəxəssisləri iştirak etmişlər. Mərasimdə QSC-in baş direktoru Ramil Əliyev qeyri-yaşayış sahəsində görülmüş yenidənqurma, əsaslı təmir, abadlaşdırma, yaşıllaşdırma işləri və perspektiv planlar barədə məlumat vermişdir. Bildirmişdir ki, burada QSC-in torpaqların rekultivasiyası departamentinin yerləşdirilməsi nəzərdə tutulmuşdur. Tədbir iştirakçıları binada aparılmış işlər, habelə onun ərazisi və yaşıllaşdırma sahəsinin xidmət məntəqəsi ilə tanış olmuşlar.
Bundan sonra QSC-in baş ofisində keçirilən təntənəli toplantıda baş direktor Ramil Əliyev qurumun yaranması, fəaliyyəti, ötən illərdə əldə olunan nailiyyətlər və qarşıda duran vəzifələr barədə məruzə etmişdir. ARDNŞ-in idarə və müəssisə rəhbərləri kollektivi təbrik etmiş, QSC tərəfindən ARDNŞ-in mədən ərazilərində həyata keçirilən layihələrin əhəmiyyətindən danışmış, cəmiyyətin fəaliyyətini yüksək qiymətləndirmişlər.
Toplantıda QSC-in əməkdə fərqlənən bir qrup əməkdaşına fəxri fərmanlar və pul mükafatları təqdim olunmuşdur. QSC-in 5 illiyi ilə əlaqədar tədbirlər “Ekol” mini-futbol klubunun yoldaşlıq görüşləri ilə davam etdiriləcəkdir.
“Ekol” Mühəndislik Xidmətləri” QSC ARDNŞ (51 faiz) və “Lancer Services S.A.” şirkətinin (49 faiz) təsisçiliyi ilə 2006-cı il martın 1-də yaradılmış və həmin il aprelin 17-də hüquqi şəxs kimi dövlət qeydiyyatından keçmişdir. QSC-in əsas fəaliyyəti respublikamızda, xüsusilə ARDNŞ-in istehsalat sahələrində ekoloji problemlərin aradan qaldırılması istiqamətində müxtəlif layihələrin həyata keçirilməsini əhatə edir.
Bölmənin digər xəbərləri
