Ekologiya və Təbii Sərvətlər Nazirliyinin mütəxəssisləri torpaq sürüşməsinin səbəbini tapıblar
Bakı, 2 aprel (AZƏRTAC). Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin mütəxəssisləri Hacıqabul rayonu ərazisində baş vermiş torpaq sürüşməsi ilə əlaqədar həmin əraziyə baxış keçirmişlər.
ETSN-dən AZƏRTAC-a verilən məlumata görə, baxış zamanı ərazidə baş verən torpaq parçalanmasının Qərbi Xəzər lineamentinin fəallaşması nəticəsində əmələ gəldiyi müəyyən olunmuşdur. Bu translitosfer yarığının üzərində yerləşdiyinə görə Hacıqabulda martın 5-də 3,5 bal gücündə zəlzələ baş vermiş, Qobustan rayonu ərazisində isə martın 13-də Şıxzairli, Ərəbşahverdi və Kürsəngi-Xıdırlı sahəsindəki palçıq vulkanları fəallaşmışdır.
Neotektonik aktivləşmə nəticəsində Muğanlı, Şərədil və Acıdərə sürüşmə sahələrində də fəallıq müşahidə olunmuş, Şirvan-Salyan magistral avtomobil yolunda və Yeni Xələc kəndində evlərdə çatlar əmələ gəlmişdir.
Bölmənin digər xəbərləri
