Ekspert: Fransanın Ermənistanın acınacaqlı məğlubiyyəti ilə bağlı mövqeyi fransızsayağı ağlaşmadır
Bakı, 12 noyabr, AZƏRTAC
Minsk qrupunun həmsədrlərindən biri kimi 26 illik fəaliyyəti dövründə Azərbaycan torpaqlarının işğalının davam etməsi üçün bütün mümkün vasitələrdən istifadə edən, dünyada qondarma erməni soyqırımı yalanının əsas körükçülərindən biri olan Fransanın rəsmi dairələrinin Ermənistanın acınacaqlı məğlubiyyətinə münasibətdə ermənidən daha artıq ermənilik etmələri təəccüb doğurmamalıdır. Bu, rəsmi Parisin Cənubi Qafqazdakı strateji hədəflərinin tamamilə sıradan çıxmasına, çirkli əllərinin bölgədən üzülməsinə, “kiçik bacısı” olan Ermənistana verdiyi “öyüd-nəsihətlərinə” fransızsayağı ağlaşmasıdır. İki bacı baş-başa verib ağlaşırlar.
Bu fikirləri AZƏRTAC-a siyasi ekspert Elçin Mirzəbəyli bildirib.
Elçin Mirzəbəyli deyib: “Bir məqamı da qeyd edim ki, Emmanuel Makronun rəhbərik etdiyi Fransa hakimiyyəti Ermənistanla, xüsusilə də uğursuz küçə siyasətçisi Nikol Paşinyanla bağlı məsələlərə özündən öncəki sələflərindən daha aqressiv yanaşır. Fransanın daha öncəki prezidentlərinin Azərbaycan torpaqlarının Ermənistan tərəfindən işğalına Makrondan daha ölçülü yanaşdıqlarını, düşünürəm ki, xatırlatmağa ehtiyac yoxdur. Emmanuel Makronun və ətrafının sərsəmləmələrində isə onları Fransada hakimiyyətə gətirən qlobal bank-maliyyə fırıldaqçılarının - “rəngli inqilablar” epopeyası müəlliflərinin xüsusi rolu var. Emmanuel Makron Ermənistandan daha çox onunla eyni, yaxud paralel mərkəzlərdən idarə olunan Nikol Paşinyanın aqibəti üçün ağlayır. Çox güman ki, 2022-ci ildə Fransada keçiriləcək seçkilərdə, yaxud daha öncə özünün də acınacaqlı məğlubiyyətə düçar olacağından, milli dövlətlərin məhvi ideyası ilə çıxış edən müəllimlərinin arzu və istəklərinin tarixin arxivinə gömüləcəyindən narahatdır.
Emmanuel Makronun ermənilərə olan xüsusi münasibətində gəldikdə isə bunun üçün onun Ermənistanda keçirilən “Frankofaniya günləri” çərçivəsində verdiyi açıqlamalara diqqət çəkmək yetərlidir. Makrona görə ermənilər Fransanın tarixini yaradıblar. Sitat: “Demək olar ki, biz ermənilərlə yarı həmvətənik... Ermənilər tariximizin bir hissəsi və qürur mənbəyimizdir”.
Doğrusu, Emmanuel Makron ermənilərlə bağlı bu fantastik dərəcədə mübaliğəli ifadələri səsləndirəndə Fransa prezidentinin mənşəcə erməni olduğunu düşünmüşdüm. Çünki özünə, xalqına və ölkəsinə hörmət edən bir fransızın “ermənilərin Fransanın tarixini yaratdıqlarını” deyə biləcəyini ağlıma belə gətirə bilmirdim. Ermənilərin Fransanın tarixində oynadıqları hansısa rolla bağlı isə heç bir tutarlı fakt yoxdur. Təbii ki, ermənilərin tarixlə bağlı heç bir mənbəyi olmayan uydurma iddialarını nəzərə almasaq...
Kanada rəhbərliyinin də Fransa ilə eyni mövqe sərgiləməsi də baş nazir Castin Trudonun dostu Emmanuel Makronla birlikdə Ermənistanda keçirilən “Frankofaniya günləri”ndən sonra bir siyasətçi kimi müstəqil mövqeyini tamamilə itirməsi ilə bağlıdır. Əks təqdirdə, Castin Trudo monoetnik, yüz minlərlə azərbaycanlını etnik təmizləməyə məruz qoyan, işğalçı, faşist Ermənistanda siyasi bənzəri Nikol Paşinyanın “ekstremizm, dözümsüzlük və nifrətə qarşı birgə mübarizə” haqqında sərsəmləmələrini xüsusi heyranlıqla dinləməz, Azərbaycan rəqsinin sədaları altında Nikol və Emmanuellə birlikdə, yumşaq desək, ermənisayaq atılıb düşməzdi.
Şübhəsiz ki, Fransa və Kanadanın Azərbaycan torpaqlarında erməni işğalına son qoyulmasına bu qədər aqressiv reaksiya vermələrinin başlıca səbəblərindən biri də hər iki ölkədəki çoxsaylı erməni diasporu ilə bağlıdır.
2019-cu ildə keçirilən seçkilərdə Castin Trudo baş nazir postunu çətinliklə saxlaya bilsə də, onun rəhbərlik etdiyi Liberal partiya parlamentin aşağı palatasında mühafizəkarlara məğlub olmuşdu. Çox güman ki, erməni diasporunun maliyyə dəstəyi ilə baş nazir postunu qoruyub saxlayan Trudo növbəti mərhələdə partiyasının mövqelərini gücləndirmək üçün Kanadada yaşayan ermənilərin daha böyük dəstəyini qazanmaq istəyir”.
Bölmənin digər xəbərləri
