Ekspert: Türkiyədə bələdiyyələrin bir çox probleminin həlli kimin seçiləcəyindən asılıdır
İstanbul, 30 mart, Günel Karatepe, AZƏRTAC
Sabah Türkiyə yenidən seçkiyə gedir. Ölkədə prezident seçkiləri qədər mühüm olan yerli özünüidarə orqanlarına seçkilərdə Türkiyənin 81 vilayət, 973 rayon və 390 qəsəbəsində bələdiyyə şuralarının başçıları və tərkibi, həmçinin 50 min 336 kənd və məhəllə muxtarı müəyyən ediləcək.
Türkiyəli iqtisadi ekspert, yazıçı Sadi Özdemir AZƏRTAC-a müsahibəsində bu səsvermənin nəticəsinin beş il əvvəlki seçkilərdən daha aydın göründüyünü deyib.
“Müxalifət 2019-cu ildə böyük şəhərlərdə bələdiyyə seçkilərini qazandığı üçün ötənilki prezident seçkilərində də iddialı idi. Lakin gözlədikləri nəticəni ala bilmədilər. Prezident seçkilərini Rəcəb Tayyib Ərdoğanın qazanması əvvəlki seçkidə hakim Ədalət və İnkişaf Partiyasından (AK Parti) Cümhuriyyət Xalq Partiyasına (CHP) keçən bəzi bələdiyyələrin yenidən AK Partiyə qayıtması ehtimalını da olduqca artırdı”, - deyə Özdemir bildirib.
Bu seçkidə İstanbul, Adana, Əskişəhər kimi şəhərlərin bələdiyyə sədrlyinin AK Partiyə qayıtması ehtimalının yüksək olduğunu, Cumhur İttifaqının daha çox uğur qazanacağını düşündüyünü qeyd edən müsahibimiz deyib: “Ümumi ictimai rəyə baxdıqda, xüsusilə böyük şəhərlərdəki əsas problemlər baxımından müxalifətlə bağlı böyük ölçüdə məyusluq olduğunu görürük. Misal üçün, ötən beş ildə İstanbulun yenidən qurulması işləri daha sürətli aparılmalı idi. Hazırkı bələdiyyə sədri Əkrəm İmamoğlu ötən seçki kampaniyasında yüz min mənzilin yenidən inşasına söz vermişdi. Lakin bu rəqəm yeddi mindən yuxarı qalxmadı. İstanbulun əsas problemlərindən olan nəqliyyat, relsli sistem, metro və ümumiyyətlə sərnişindaşımaya daha çox sərmayə qoyulacağı ilə bağlı da vədlər verilmişdi. Bu sahə və ümumiyyətlə bələdiyyənin gündəlik xidmətləri üzrə böyük axsamalar oldu. Belə misalları CHP-nin idarə etdiyi digər şəhərlər üçün də çəkmək olar”.
Müxalif partiyalar arasında ziddiyyətlərin meydana gəldiyini, eləcə də sədrliyə uyğun olmayan namizədlərin irəli sürüldüyünü qeyd edən müsahibimiz deyib ki, bu kimi amillər seçicilərin hakim partiyanın namizədinə üstünlük verəcəyi ehtimalını artırır: “Ötən il Türkiyədə keçirilən prezident seçkilərindən sonra müxalifət üç yerə bölündü və hər tərəf bir-birinin ziddinə ifadələr işlətdi. Fikrimcə, bu seçkilərdə müxalifətin uğursuz nəticə göstərəcəyi təqdirdə CHP-də yenidən sədr keçirilə bilər ki, burada da Kamal Kılıçdaroğlunun öz namizədliyini irəli sürməsi istisna deyil”.
Özdemir AK Partinin bu seçkiləri qazanacağı təqdirdə böyük şəhərlərdə, misal üçün İstanbulda irimiqyaslı layihələrin icrasına başlanacağını vurğulayıb: “Təbii fəlakətlərə qarşı İstanbulun yenidən qurulması, son beş il ərzində şəhərdə artan nəqliyyat sıxlığının aradan qaldırılması, sənaye infrastrukturunun yenilənməsi, bələdiyyələrin sosial dəstəkləri kimi bir çox yerli problemin həlli sabah keçiriləcək səsvermədə kimin seçiləcəyindən asılıdır. Düşünürəm ki, bütün bu kimi məsələlərin həllinə xalqı kim daha çox inandırıbsa o da seçiləcək. Əlbəttə, burada vətəndaşların seçimi əsasdır və hər birimizin buna hörmətlə yanaşması vacibdir”.
Qeyd edək ki, seçki ilə əlaqədar ölkə üzrə 250 min 903 sandıq qurulub. Səsvermə hüququna malik 61,4 milyondan çox Türkiyə vətəndaşından 1 milyon 32 min 610 nəfəri ilk dəfə səs verəcək. Seçkilərdə hakim AK Parti da daxil olmaqla, ümumilikdə 34 siyasi partiyanın namizədləri yarışacaq.
Cümhur İttifaqının İstanbul Böyükşəhər Bələdiyyə sədrliyinə namizədi ölkənin sabiq ətraf mühit və şəhərsalma naziri Murat Kurum, Ankara üzrə namizədi isə paytaxtın Keçiören rayon bələdiyyəsinin hazırkı sədri Turqut Altınokdur. Ən böyük müxalif Cümhuriyyət Xalq Partiyasının İstanbul və Ankara üzrə namizədləri isə hazırkı bələdiyyə sədrləri Əkrəm İmamoğlu və Manasur Yavaşdır.
Türkiyənin əksər əyalətlərində seçki məntəqələri yerli vaxtla saat 08.00-dan 17.00-a qədər açıq olacaq. Eyni zamanda, Türkiyə Yüksək Seçki Komissiyasının qərarına əsasən, günəşin batması vaxtı nəzərə alınaraq, 32 vilayətdə səsvermə saat 07.00-dan 16.00-dək keçiriləcək.
Bölmənin digər xəbərləri
