Elçin Mirzəbəyli: Azərbaycan bölgəyə davamlı sülhün gəlməsi üçün bütün mümkün imkanlardan istifadə edir
Bakı, 22 sentyabr, AZƏRTAC
Prezident, Müzəffər Ali Baş Komandan İlham Əliyevin Laçın şəhərində Azərbaycan Bayrağını qaldırması tarixi hadisədir və özündə Azərbaycan dövlətçiliyinin işğaldan azad edilmiş bütün ərazilərimizdə bərqərar olması kimi dərin mənanı ifadə edir.
Bunu AZƏRTAC-a açıqlamasında siyasi ekspert Elçin Mirzəbəyli söyləyib.
Siyasi ekspert qeyd edib ki, Laçın Azərbaycanın Ermənistanla sərhədində yerləşən, ölkəmizin digər ərazilərinin, o cümlədən Qarabağ və Şərqi Zəngəzur iqtisadi rayonlarının təhlükəsizliyinin təmin edilməsi, kommunikasiya və bu kimi digər vacib komponentlər baxımından mühüm əhəmiyyət kəsb edən bir ərazidir. “Təsadüfi deyil ki, Birinci Qarabağ müharibəsində düşmənin əsas hədəflərindən biri də Laçın rayonu idi. Təcavüzkarlar Laçın rayonunu, o cümlədən Laçın şəhərini ələ keçirməklə digər ərazilərimizin işğalına, işğalçı qüvvələrin silah-sursat, hərbi texnika, ərzaq və digər məhsullarla təmin olunmasına yol açmışdılar. Bu isə Azərbaycanın 20 faiz ərazisinin qəsb edilməsinə və 30 ilə yaxın işğal altında saxlanılmasına əlverişli zəmin yaratmışdı.
Azərbaycan Ordusunun Laçın şəhəri, eləcə də Sus və Zabux kəndləri üzərində nəzarəti ələ alması, şübhəsiz ki, dövlətimizin başçısının qeyd etdiyi kimi, şəhidlərimizin, Azərbaycan Ordusunun rəşadətli əsgər və zabitlərinin fədakarlıqları nəticəsində əldə olunan böyük Zəfərin tərkib hissəsi, Prezident İlham Əliyevin siyasi-diplomatik qələbəsidir. Çünki Laçın şəhəri kimi mühüm strateji əhəmiyyət daşıyan bir ərazi bir güllə atılmadan, şəhid verilmədən alınıb və bu amil döyüş meydanında əldə olunan nəticənin masa üzərində uğurla tamamlanmasının unikal nümunələrindən biri sayıla bilər”, - deyə E.Mirzəbəyli diqqətə çatdırıb.
Siyasi ekspert deyib ki, işğalçı ölkənin Laçın ərazisində qanunsuz məskunlaşdırma aparmasına baxmayaraq, rayonun və şəhərin infrastrukturunun, yaşayış yerlərinin dağıdılması saxta tarixdən, mif və əfsanələrdən qaynaqlanan nifrət və kin üzərində qurulan erməni vandalizminin sərhəd tanımadığını nümayiş etdirir. Bu həm də ideoloji nağıllarla zəhərlənən erməni toplumunun dağıdıcı təfəkkürə sahib olduğunun bariz nümunəsidir. Sivil, mədəni, gerçək tarixi olan heç bir xalq başqalarının qurduqlarını dağıtmır, insan əməyinə hörmətlə yanaşır. Qanunsuz olsa da, özünün yaşadığı ərazini dağıdan bir toplumla, düşünürəm ki, bəşəriyyət tarixin heç bir dönəmində qarşılaşmayıb. Bu, qəribə təfəkkürüdür və görünür, erməni cəmiyyətinin Azərbaycan torpaqlarının işğalında iştirak edən və işğala dəstək verən hissəsi hələ də ibtidai icma təfəkküründən digər mərhələlərə, hətta ilkin feodal dünyagörüşünə də adlamağı bacarmayıb.
Qeyd edim ki, Laçın şəhərinin və digər Azərbaycan ərazilərinin, yaşayış məntəqələrimizin, tarixi, dini, mədəni abidələrimizin ermənilər tərəfindən məhv edilməsinə, talanmasına, erməniləşdirilməsinə, torpaqlarımızda qanunsuz məskunlaşdırma aparılmasına, yurd yerlərimizin “mina tarlası”na çevrilməsinə görə təkcə Ermənistan deyil, on illər boyu bu ağır cinayətlərə göz yumanlar da məsuliyyət daşıyırlar. Məhz bu aspektdən, 30 ilə yaxın bir müddət ərzində bölgəyə turist səfərləri həyata keçirməklə, işğalçı ilə işğala məruz qalanı eyniləşdirməklə, bir çox hallarda təcavüzkara dəstək verməklə işini bitmiş hesab edən təsisatlar, o cümlədən ömrünü başa vurmuş ATƏT-in Minsk qrupu kimi təqaüdçü diplomatların “pansionatı” Azərbaycan xalqının yanında legitimliyini çoxdan itirib və ölkəmizdə heç bir şəxs bu ifadəni belə eşitmək istəmir”.
Elçin Mirzəbəyli vurğulayıb ki, Azərbaycan öz gücü hesabına ərazi bütövlüyünü təmin edib və bölgəyə davamlı sülhün gəlməsi üçün bütün mümkün imkanlardan istifadə edir. Müzəffər Azərbaycan Ordusunun bir çox hallarda kiçik miqyaslı təxribatlara münasibətdə kifayət qədər səbirli davranması da, ölkəmizin insan həyatına, humanizm prinsiplərinə və sülhə verdiyi önəmdən qaynaqlanır. Lakin yenidən revanşist hisslərlə yaşayan müharibə caniləri və onların ideoloji zəhərini dadanlar unutmasınlar ki, “Dəmir yumruq” yerindədir və sərhədlərimizdə təhlükə yaratmağa çalışanların bir göz qırpımında başını əzəcək.
Bölmənin digər xəbərləri
