Elm Tarixi İnstitutunda “Azərbaycan tibbinin korifeyləri” toplusu nəşr olunub
Bakı, 21 fevral, AZƏRTAC
Azərbaycan Milli Elmlər Akademiyasının (AMEA) Elm Tarixi İnstitutunda “Azərbaycan tibbinin korifeyləri” adlı yeni toplu çap olunub.
İnstitutdan AZƏRTAC-a bildirilib ki, Azərbaycan, rus və ingilis dillərində təqdim olunan kitab AMEA-nın həqiqi və ya müxbir üzvü olmuş və hazırda fəaliyyət göstərən Azərbaycanın görkəmli tibb elm adamlarının həyat və fəaliyyətinə həsr edilib.
Kitab hazırlanarkən Azərbaycanda və Rusiyada yerləşən müxtəlif fondlarda saxlanan materiallardan, o cümlədən AMEA-nın bir çox qurumlarının, ali təhsil müəssisələrinin arxivlərindən, biblioqrafik mənbələrdən, internet resurslarından, KİV-dən, eləcə də ailə arxivlərindən əldə edilən sənədlərdən istifadə olunub.
Kitabın müəllifləri - Elm Tarixi İnstitutunun direktoru, tarix üzrə elmlər doktoru Məryəm Seyidbəyli və institutun Nəzəri-metodoloji problemlər şöbəsinin əməkdaşı, sənətşünaslıq üzrə fəlsəfə doktoru Dilarə Vahabovadır.
Nəşrin elmi redaktoru - tibb üzrə elmlər doktoru, Əməkdar elm xadimi, Azərbaycan Respublikası Səhiyyə Nazirliyinin Milli Onkologiya Mərkəzinin baş direktoru akademik Cəmil Əliyevdir.
“Azərbaycan tibbinin korifeyləri” toplusu tibb sahəsində çalışan mütəxəssislər, tibb üzrə təhsil alan tələbələr və geniş oxucu kütləsi üçün nəzərdə tutulub.
Bölmənin digər xəbərləri
