CƏMİYYƏT
Emin Hüseynov: Azad edilmiş ərazilərdə müxtəlif alternativ enerji mənbələrinin yaradılması planlaşdırılır VİDEO
Bakı, 24 dekabr, AZƏRTAC
2021-ci ildə başlamış işlər gələn il qrafikə uyğun davam etdiriləcək. Bundan başqa, xüsusi dövlət proqramı hazırlanır. Azərbaycan 2030-cu il üçün sosial-iqtisadi inkişafa dair Milli Prioritetlərdə qarşıya qoyulan hədəfləri yerinə yetirmək üçün çalışır. Həmçinin işğaldan azad olunmuş torpaqlara qayıdışla bağlı ərazilərin, insanların reinteqrasiyası hazırlanır.
Bu sözləri AZƏRTAC-a müsahibəsində Azərbaycan Respublikası Prezidentinin Qarabağ iqtisadi rayonuna daxil olan işğaldan azad edilmiş (Şuşa rayonu istisna olmaqla) ərazilər üzrə xüsusi nümayəndəsi Emin Hüseynov söyləyib.
E.Hüseynov bildirib: “İşğaldan azad olunmuş bir sıra rayonların baş planları artıq hazırlanıb. Bunlar Ağdam, Füzuli, Cəbrayıl rayonları və Şuşa şəhəridir. Digər ərazilərdə də işlər davam etdirilir. Demək olar ki, böyük ehtimalla bu işlər gələn il yekunlaşacaq. Bu işlərlə paralel olaraq, minatəmizləmə əməliyyatlar da davam etdirilir. Çünki çirklənmiş ərazilər həddən çoxdur. Bundan başqa, baza infrastruktur layihələri icra edilir, 10-dan çox avtomobil yolunun tikintisi başlayıb. Şərqi Zəngəzur iqtisadi rayonunda dəmir yolu ilə bağlı layihələr yeni ildən qrafikə uyğun davam etdiriləcək”.
Xüsusi nümayəndə qeyd edib ki, elektrik sistemlərinin qurulması işləri demək olar yekunlaşıb. Qarabağ bölgəsində demək olar bütün yarımstansiyalar tikilib. Bundan əlavə, müxtəlif alternativ enerji mənbələrinin yaradılması planlaşdırılır. Bunlar günəş, külək, həmçinin su elektrik stansiyalarıdır. Eyni zamanda, işğaldan azad olunmuş ərazilərdə yeni iş yerlərinin yaradılması prosesinə də başlanılacaq.