ERM şirkətinin nümayəndələri ARDNŞ-nin neftlə çirklənmiş torpaqların təmizlənməsi layihələri ilə maraqlanmışlar
Bakı, 17 avqust (AZƏRTAC). ARDNŞ-nin Ekologiya İdarəsinin Kompleks Tədqiqatlar Laboratoriyasında “Environmental Resources Management” (ERM) şirkətinin nümayəndələri ilə görüş keçirilmişdir.
AZƏRTAC xəbər verir ki, görüşdə ARDNŞ tərəfindən yerinə yetirilən ekoloji layihələr və ekologiya İ\idarəsinin fəaliyyəti barədə, eləcə də ERM şirkətinin bir çox ölkələrdə həyata keçirdiyi ekoloji layihələr haqqında danışılmışdır.
Qonaqlar ARDNŞ-nin həyata keçirdiyi neftlə çirklənmiş torpaqların təmizlənməsi layihələri ilə maraqlanmış və bu sahədə tətbiq olunan texnologiyalar haqqında onlara geniş məlumat verilmişdir.
ERM şirkətinin əməkdaşları müasir cihaz və avadanlıqla təchiz edilmiş Kompleks Tədqiqatlar Laboratoriyasının imkanları, aparılan analitik tədqiqat işləri, göstərilən laboratoriya xidmətləri ilə yaxından tanış olmuşlar.
Sonda tərəflər arasında qarşılıqlı əməkdaşlıq imkanları haqqında fikir mübadiləsi aparılmışdır.
Bölmənin digər xəbərləri
