Ermənipərəst “REGNUM” agentliyi Xraxoba və Uryanoba kəndləri haqqında yalan məlumat yayır
Bakı, 12 noyabr (AZƏRTAC). Ermənistanın keçmiş prezidenti Robert Koçaryana məxsus olan və baş redaktor Vigen Akopyan tərəfindən idarə edilən Rusiyanın ermənipərəst “REGNUM” informasiya agentliyi faktların saxtalaşdırılması və Azərbaycan xalqının qardaş qonşu xalqlarla qarşı-qarşıya qoyulması üçün Yerevanın sifarişini yerinə yetirməkdədir. Azərbaycan KİV-lərinin istər Azərbaycan SSR-in, istərsə də müstəqil Azərbaycan Respublikasının ərazisində heç vaxt Rusiyanın heç bir anklavının olmadığını dəfələrlə xatırlatdığına baxmayaraq, erməni təşviqatının və təbliğatının Moskva filialı Azərbaycanın Xaçmaz rayonunda yerləşən iki kənd - Xraxoba və Uryanoba kəndləri barəsində “anklav” uydurmasını yayıb öz oxucularının beyninə yeritməkdə davam edir.
Yaxşı olardı ki, reqnumçu erməni təbliğatçılar və təşviqatçılar hər şeydən əvvəl “anklav” və “eksklav” terminləri arasındakı fərqi özləri üçün aydınlaşdırsınlar. Anklav bir dövlətin hər tərəfdən başqa dövlətin torpaqları ilə əhatə olunmuş ərazisidir. Büsengen və Kampione - müvafiq olaraq AFR-in və İtaliyanın hər tərəfdən İsveçrə ilə əhatə olunmuş əraziləri belə anklavlardır. Onlar İsveçrənin anklavları, AFR və İtaliyanın isə eksklavlarıdır. Hazırda Ermənistan tərəfindən işğal olunmuş Kərki, Yuxarı Əskipara, Barxudarlı, Sofulu və Qızılhacılı kəndləri Azərbaycanın eksklavlarıdır.
Azərbaycan ərazisində heç vaxt Rusiya anklavı olmamışdır. 1954-cü ildə Azərbaycan SSR-in Xaçmaz rayonu ərazisində yerləşən iki sahə qışlaq kimi istifadə olunmaq üçün 50 il müddətinə Dağıstan MSSR-ə icarəyə verilmiş və orada ləzgilərin yaşadıqları göstərilən iki kənd salınmışdır. Bəlkə icarə ilə mülkiyyət hüququ arasındakı fərqi anlamaq vaxtı gəlib çatmışdır! 1954-cü ilə qədər də, ondan sonra da bu ərazilər həmişə rəsmən Azərbaycan SSR-in bir hissəsi olmuşdur. Bu iki kəndi “Rusiya anklavları” adlandıranlar qoy ilkin mənbəyə - 1954-cü il sənədinə müraciət etsinlər!
Bu yaxınlarda Ermənistanda Zəngəzurun yay otlaqlarının mal-qara otarmaq üçün İran çobanlarına icarəyə verilməsi haqqında da danışılırdı. Elə çıxır ki, onda “REGNUM” agentliyinin vicdansız jurnalistləri bu Zəngəzur otlaqlarını “İran anklavı” adlandıracaqlar?
Torpağın özü heç vaxt mübahisə predmeti olmamışdır. SSRİ dağıldıqdan və 2004-cü ildə 50 illik icarə müddəti bitdikdən sonra yalnız bu iki kəndin sakinlərinin statusu məsələsi meydana çıxmışdır. Burada onların Rusiya torpağında tikilməmiş və bir an da rus torpağı üzərində olmamış evlərində yaşaması məsələsindən söhbət gedir.
Yerli sakinlərə üç variant təklif edilmişdir: ya Azərbaycanın vətəndaşlığını qəbul edib öz evlərində qalmaq, ya Rusiya vətəndaşı kimi öz evlərində qalıb Azərbaycan miqrasiya qanunvericiliyinə uyğun olaraq Azərbaycanda yaşamaq hüququ verən sənəd rəsmiləşdirmək, ya da öz daşınmaz əmlaklarını bazar qiyməti ilə satıb dövlət büdcəsi hesabına Rusiya ərazisinə köçmək. Düzdür, Dağıstan ərazisində azərbaycanlıların yaşadıqları iki kəndin - Zügüloba və Aşağı Katrux kəndləri əhalilərinin mübadiləsi barədə qeyri-rəsmi söhbətlər olmuşdur. Lakin ərazi mübadiləsindən heç vaxt söhbət getməmişdir. Kənd sakinlərinin statusu məsələsinin həllinin başqa variantlarını təklif etmək çətindir. Hər halda heç kəs heç kəsi zorla köçürməmiş, öz evlərini qoyub getməyə məcbur etməmişdir.
Buna görə də bir daha xatırladırıq ki, Xraxoba və Uryanoba heç vaxt “Rusiya anklavları” olmamışdır, erməni təşviqatının və təbliğatının üçüncü ölkələrin ərazisində fəaliyyət göstərən filiallarının fitnələrinə uymamağa çağırırıq.
Bölmənin digər xəbərləri
