Ermənistan qazdığı quyuya özü düşür
Bakı, 26 aprel, AZƏRTAC
Azərbaycanın Laçın dəhlizinin girişində nəzarət-buraxılış məntəqəsi qurması ölkəmizin növbəti siyasi- diplomatik qələbəsidir. Təbii ki, ölkəmizin öz suveren ərazisində sərhəddə nəzarət-buraxılış məntəqəsi təsis etməsi Azərbaycanın legitim hüququdur və burada hər hansı beynəlxalq hüquq normalarının pozuntusundan danışmaq gülüncdür. Ermənistan isə hələ də ümidini Azərbaycana qarşı qərəzli olan bəzi beynəlxalq təşkilatlara və anti-Azərbaycan qüvvələrə bağlayıb. İşğalçılıq siyasətindən əl çəkməyən bu ölkənin rəhbərliyi düşünür ki, əvvəlki illərdə olduğu kimi, yenə də Qarabağın yeraltı və yerüstü sərvətlərindən dədələrinin malı kimi istifadə edəcəklər. Ancaq yanılırlar. Dörd aydan artıqdır ki, ekofəallar, QHT nümayəndələri və könüllü gənclərin keçirdikləri dinc aksiya hayları bütün ümidlərini alt-üst etdi. Bütün dünya şahid oldu ki, Azərbaycanın mərd oğul və qızları Vətənin hər qarış torpağı uğrunda canlarını qurban verməyə hazırdırlar. Onlar işğalçı ölkənin Azərbaycanın təbii sərvətlərini istədikləri kimi talan etməsinin qarşısını aldılar. Üstəlik, Azərbaycan Ermənistanın Laçın-Xankəndi yolundan sui-istifadə etməsi və bunun nəticəsində təhlükəsizlik təhdidləri səbəbindən iki ölkənin sərhədində sərhəd-keçid məntəqəsi yaratdı. Bu, heç də Qarabağda yaşayan ermənilərin blokadaya alınması deyil. Çünki bu bölgənin erməni sakinlərinin hər iki istiqamətə gediş-gəlişi üçün müvafiq şərait təmin olunacaq.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
Onun sözlərinə görə, həmişə olduğu kimi, Ermənistan tərəfi yenə də vay-şüvənlik salır, guya, Azərbaycan Qarabağ bölgəsində yaşayan erməniləri məcbur edir ki, onlar yaşadıqları ərazini tərk etsinlər. Əslində, burada heç bir zorakılıq əlaməti yoxdur. Azərbaycan öz ərazisində hər hansı bir iş görəndə digər ölkələrlə məsləhətləşməli deyil . Həmin ərazidə sərhəd-keçid məntəqəsinin quraşdırılmasından narahat olan ermənilər və onların havadarları çox yaxşı bilirlər ki, separatçılara dəstək verən cinayətkar qruplar bundan sonra hər hansı bir addım ata bilməyəcəklər. Əslində, bundan sonra sülhməramlıların müşayiəti ilə sərbəst şəkildə keçə və özləri ilə narkotik maddələr, silah-sursat, minalar daşıya bilməyəcəklər. Qarabağda yaşamaq istəyən ermənilər Azərbaycanın reinteqrasiya təklifi ilə razılaşmalıdırlar. Çıxış yolu birdir: ya Azərbaycan vətəndaşlığını qəbul etməli, ya da həmin ərazini tərk etməlidirlər.
Ə.Bədəlov deyib ki, Azərbaycan Ordusunun Ermənistan üzərindəki tarixi Qələbəsindən iki ildən artıq vaxt keçsə də, işğalçı ölkədə bu Zəfəri həzm edə bilmirlər. Digər tərəfdən Fransa kimi ermənipərəst dövlətlərin Ermənistana havadarlığı revanşistləri fəallaşdırıb. Ancaq fakt faktlığında qalır. Dünyanın əksər ölkələri bu qələbəni qəbul edib və Azərbaycanın ərazi bütövlüyünü tanıyıb. Bütün vasitələrlə Qarabağda status-kvonu dəyişməyə çalışan Ermənistan rəhbərliyi qazdığı quyuya özü düşdü. Azərbaycan tərəfi isə Qələbədən sonra regionda baş verən prosesləri yaxından izləyərək , bir-birinin ardınca düşünülmüş addımlar atır.
Siyasi şərhçi artıq Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında qurulan sərhəd-buraxılış məntəqəsində bayrağımızın ucaldıldığını bildirərək deyib: “Bu, həm Ermənistan rəhbərliyinə, həm bu ölkənin havadarlarına, həm də Qarabağın erməni icmasına ünvanlanmış mesajdır. Bundan sonra Qarabağda yaşayan ermənilər nə məğlub Ermənistan ordusuna, nə də xarici güclərə ümidlərini bağlasınlar. Yeganə çıxış yolu Azərbaycan cəmiyyətinə inteqrasiya etmək, ya da digər ölkələrdəki qohum-əqrəbalarının yanına köçməkdir. Hazırda Ermənistanda buna görə ciddi təşviş yaranıb. İndi də başlayıblar Azərbaycana sanksiyalar tətbiq olunması çağırışlarına. Səbəb isə çox gülməlidir. Azərbaycan öz ərazisində sərhəd-keçid məntəqəsi qurub. Bunun kimə nə aidiyyəti var? Azərbaycan öz öhdəlikləri çərçivəsində Laçın-Xankəndi yolunda hərəkət edən vətəndaşların, nəqliyyat vasitələrinin və yüklərin təhlükəsizliyinə zəmanət verir və bu istiqamətdə müvafiq tədbirləri davam etdirəcək. Bəs görəsən Ermənistan və onun havadarı Fransa nədən narahatdır?”.
Siyasi şərhçi Ermənistanın bu vay-şüvənliyinin elə bir ciddi təsiri olmayacağını da vurğulayıb. Deyib ki, Ermənistanın çağırış etdiyi bütün dövlətlər yalnız bəyanat verməklə kifayətlənə bilərlər: “İşğalçı ölkənin Azərbaycana sanksiya tətbiq etmək tələbi yalnız xülya olaraq qalacaq. Ermənistanla şərti sərhəd istiqamətində Dövlət Sərhəd Xidməti postunun qurulması ölkəmizin siyasi-diplomatik meydanda növbəti qələbəsidir. Hələ bunun ardı var. Prezident, Müzəffər Ali Baş Komandan İlham Əliyevin dediyi kimi: “Nəyi necə, nə vaxt etmək lazımdır, onu mən bilirəm”.
Bölmənin digər xəbərləri
