Ersin Tatar: İkinci Qarabağ müharibəsində Zəfər Azərbaycanı daha da gücləndirib
Ankara, 17 iyul, AZƏRTAC
Qardaş Azərbaycanın qəlbimizdə həmişə xüsusi yeri olacaq. AZƏRTAC xəbər verir ki, bu sözləri Şimali Kipr Türk Cümhuriyyətinin (ŞKTC) Prezidenti Ersin Tatar iyulun 17-də Lefkoşada İkinci Qarabağ müharibəsi şəhidlərinin ailə üzvlərindən ibarət qrupla görüşü zamanı deyib.
Kipr türklərinin lideri Azərbaycanın qəhrəmanlarının doğmaları ilə görüşdən çox məmnun olduğunu bildirib. Onun sözlərinə görə, ŞKTC ilə Azərbaycan arasında münasibətlər mühüm səviyyəyə çatıb. Siyasətçi vurğulayıb: “Bu nailiyyətlər Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın dəstəyi sayəsində əldə olunub”.
Ersin Tatar qloballaşma prosesləri fonunda türk dövlətlərinin həmrəylik və birliyinin, eləcə də ticari və siyasi əlaqələrinin inkişafının artan əhəmiyyətinə diqqət çəkib. O vurğulayıb: “Mən türk dövlətlərinin gəncləri arasında əlaqələrin qurulmasını xüsusilə vacib hesab edirəm. Ölkələrimizin gənc nəsli bir-birini daha yaxşı tanımalı və əlaqələri möhkəmləndirməlidir”.
ŞKTC Prezidenti 44 günlük Vətən müharibəsi dövründə Kipr türklərinin azərbaycanlı qardaşları üçün dua etdiklərini bildirib. Azərbaycandan gələn qonaqlara müraciət edən Ersin Tatar deyib: “Bizim üçün doğma olan insanların həlak olması Kipr türklərini dərindən kədərləndirdi, Qarabağ müharibəsindəki Qələbə isə tarixin parlaq səhifəsi oldu. Unutmayın ki, Vətən uğrunda canından keçən şəhidlər ölmür. Biz unutmayacağıq və şəhidlərin unudulmasına imkan verməyəcəyik. Onlar doğma torpaqlarını geri qaytarmaq üçün canlarını fəda etdilər. Bu Zəfər Azərbaycanı daha da gücləndirib”.
Siyasətçi xatırladıb ki, Kiprdə də çoxlu sayda şəhid var. “Xalqımız şəhidləri unutmur. Onlar bizim qəlbimizdə əbədi yaşayırlar”, -deyə Ersin Tatar bildirib.
“Zəfər” Azərbaycan Şəhid Ailələrinə Dəstək İctimai Birliyinin rəhbəri Sevinc Orucova, öz növbəsində, Azərbaycan və ŞKTC-nin ictimai strukturları arasında əlaqələrin inkişafının vacibliyini qeyd edib.
Şəhid ailələri üzvlərinin Lefkoşaya səfəri iyulun 28-dək davam edəcək.
Bölmənin digər xəbərləri
