Əsgərlərimizin asudə vaxtının səmərəli təşkili məqsədilə kitab toplama aksiyasına yenidən start verilir
Bakı, 1 avqust, AZƏRTAC
Azərbaycan Respublikası Müdafiə Nazirliyinin təşkilatçılığı, “İrəli” İctimai Birliyinin tərəfdaşlığı ilə “Əsgərin kitab rəfi” kitab toplama aksiyasına yenidən start verilir.
İctimai Birlikdən AZƏRTAC-a bildiriblər ki, aksiyanın əsas məqsədi əsgərlərimizin asudə vaxtının səmərəli təşkilinə töhfələr vermək, eləcə də, gənclər arasında mütaliəyə marağın artırılmasıdır.
Budəfəki aksiya çərçivəsində də elmi, bədii, publisistik və digər janrlarda kitablar toplanacaq.
Sonda toplanmış kitablar işğaldan azad edilmiş ərazilərdə xidmət edən əsgərlərimizə üstünlük verilməklə bütün hərbi qulluqçularımıza çatdırılacaq.
Birlik bütün gəncləri, təhsil müəssisələrini, qeyri-hökumət təşkilatlarını, özəl sektor və media nümayəndələrini aksiyada fəal iştirak etməyə çağırır. Kitab hədiyyə etmək istəyən şəxslər “İrəli” İctimai Birliyinə yaxınlaşaraq kitablarını təqdim edə bilərlər.
Qeyd edək ki, “Əsgərin kitab rəfi” kitab toplama aksiyası artıq ikinci dəfədir ki, həyata keçirilir.
Ötən il keçirilən kitab toplama aksiyasında “İrəli” İctimai Birliyi tərəfindən on iki mindən çox kitab toplanaraq Müdafiə Nazirliyinə təqdim edilib.
Bölmənin digər xəbərləri
