Ətraf mühitin çirklənməsi ilə əlaqədar bir sıra problemlər mövcuddur
Bakı, 31 may (AZƏRTAC). “Böyük Bakı” ərazisi üzrə ətraf mühitin çirklənməsi ilə əlaqədar bir sıra problemlər mövcuddur.
AZƏRTAC xəbər verir ki, bu barədə “Böyük Bakının Regional İnkişaf Planı” layihəsinin (sxemi) təqdimatında Bakı Dövlət Layihə İnstitutunun direktoru İlqar İsbatov məlumat vermişdir.
Qeyd olunmuşdur ki, “Böyük Bakı” ərazisində 100 ildən artıq müddətdə quruda neft hasilatı və sənaye istehsalı nəticəsində torpaqlar və göllər çirklənmiş, çirkab sular təmizlənmədən Xəzər dənizinə axıdılaraq Bakı buxtasının çirklənməsinə səbəb olmuşdur. Bundan əlavə, Məxsusi Bakının mərkəzi hissəsində yerləşən və fəaliyyəti dayanmış köhnə sənaye müəssisələrinin ərazisindəki torpaqlar da çirklənmişdir.
Araşdırmalara əsasən ümumilikdə Böyük Bakı regionu üzrə çirklənmiş ərazilərin ümumi sahəsi 30 min 608 hektar təşkil edir. Bunun 23 min 428 hektarı neftlə çirklənmiş torpaqlar, 7 min 180 hektarı isə çirklənmiş göllərdir.
İnstitut direktoru həmçinin vurğulamışdır ki, statistikaya görə, Azərbaycan Respublikası Dövlət Neft Şirkəti tərəfindən təmizlənmiş və rekultivasiya olunmuş torpaqların ümumim sahəsi 800 hektardır.
Bölmənin digər xəbərləri
