ETSN-də beynəlxalq layihə olimpiadasının iştirakçıları ilə görüş keçirilmişdir
Bakı, 7 aprel (AZƏRTAC). Ekologiya və Təbii Sərvətlər Nazirliyində (ETSN) “İnero-Avrasiya” Ətraf Mühitin Mühafizəsi V Beynəlxalq Layihə Olimpiadasının bir qrup iştirakçısı ilə keçirilən görüşdə Əfqanıstan, Litva, Makedoniya, Polşa və Tailanddan gəlmiş müəllim və şagirdlər iştirak etmişlər.
ETSN-dən AZƏRTAC-a verilən məlumata görə, Nazir Hüseynqulu Bağırov təbiəti mühafizə problemlərinə həsr olunmuş beynəlxalq layihə olimpiadasının 2007-ci ildən başlayaraq hər il keçirilməsini yüksək qiymətləndirmişdir. O, tədbir iştirakçılarına Azərbaycanın tarixi, ölkə ərazisində genişmiqyaslı yaşıllaşdırma işlərinin aparılması, çirklənmiş torpaqların təmizlənməsi və digər işlər barədə məlumat vermişdir.
Qonaqlar Bakı şəhərinin onlarda xoş təəssürat yaratdığını bildirmiş və ətraf mühitin mühafizəsi ilə bağlı olimpiadaya təqdim etdikləri layihələr barədə danışmışlar.
Sonda olimpiada iştirakçılarına hədiyyələr təqdim olunmuşdur.
Bölmənin digər xəbərləri
