ETSN “Ətraf mühitin mühafizəsində gənc nəslin rolu” mövzusunda “dəyirmi masa” keçirmişdir
Bakı, 5 iyun AZƏRTAC). Ekologiya və Təbii Sərvətlər Nazirliyi gənclərin və yeniyetmələrin ətraf mühit sahəsində bilik və bacarıqlarının artırılması məqsədi ilə “Ətraf mühitin mühafizəsində gənc nəslin rolu” mövzusunda “dəyirmi masa” keçirmişdir.
ETSN-in Orxus İctimai Ekoloji İnformasiya Mərkəzində keçirilən tədbirdə gənclər və orta məktəb şagirdləri ilə yanaşı, ictimaiyyət nümayəndələri də iştirak etmişdir.
Nazirliyin mətbuat xidmətindən AZƏRTAC-a bildirmişlər ki, tədbirdə dövlətin ekologiya sahəsində həyata keçirdiyi uğurlu siyasət və bu istiqamətdə gənc nəslin fəal rolundan danışılmış, o cümlədən gənclərin ətraf mühit sahəsində bilik və bacarıqlarının artırılmasının zəruriliyi diqqətə çatdırılmışdır.
Tədbir iştirakçılarına, eyni zamanda, ətraf mühit və təbii sərvətlərin qorunmasında ekoloji maarifləndirmənin rolu, su ehtiyatlarının idarə olunması, iqlim dəyişmələri, yaşıl iqtisadiyyat və davamlı inkişaf və s. mövzularda geniş informasiya verilmiş və onların sualları cavablandırılmışdır.
“Dəyirmi masa”da ətraf mühit sahəsində mövcud problemlərin aradan qaldırılması məqsədi ilə qarşılıqlı əməkdaşlığın gücləndirilməsinin zəruriliyi bildirilmiş, dövlət orqanları ilə yanaşı, qeyri-hökumət təşkilatlarının və ictimaiyyətin bu sahədə fəal rolunun, əhali arasında maarifləndirmə işlərinin aparılmasının vacibliyi vurğulanmışdır.
Bölmənin digər xəbərləri
