“Ettihad” qəzetində “Azərbaycanın Müstəqillik Günü qeyd olunur” sərlövhəli məqalə dərc edilib
Əbu-Dabi, 18 oktyabr, AZƏRTAC
Birləşmiş Ərəb Əmirliklərinin ərəb dilli “Ettihad” dövlət qəzetində Azərbaycanın bu ölkədəki səfiri Daşqın Şikarovun “18 oktyabr tarixində Azərbaycan Müstəqillik Gününü qeyd edir” sərlövhəli məqaləsi dərc olunub.
AZƏRTAC xəbər verir ki, D.Şikarov ötən əsrin əvvəlində - 1918-ci il mayın 28-də Azərbaycanın İslam dünyasında və Şərqdə ilk dünyəvi demokratik dövlət qurduğunu, lakin həmin dövlətin yalnız 23 ay yaşadığını, xarici qüvvələrin müdaxiləsi səbəbindən süquta yetdiyini bildirib. Bir sıra dünya dövlətləri Azərbaycan Xalq Cümhuriyyətini tanıyıb, Azərbaycan dövlətinin rəsmi simvolları və Azərbaycan vətəndaşlığı haqqında əsasnamə qəbul edilib, kişi və qadınların bərabər hüquqlara malik olmaları tanınıb. Müvafiq qanunvericilik aktları ilə Azərbaycan Silahlı Qüvvələri, Xəzər donanması yaradılıb, Bakı Universiteti təsis edilib, yüzlərlə gəncə Avropanın aparıcı universitetlərində təhsil almaq üçün təqaüdlər ayrılıb. Eyni zamanda, icra, qanunvericilik və məhkəmə hakimiyyətlərinin tam müstəqilliyi təmin olunub.
Azərbaycan Respublikasının dövlət müstəqilliyinə aparan yollardan bəhs edən müəllif vurğulayıb ki, SSRİ-nin dağılması ərəfəsində Azərbaycan müstəqilliyini bərpa etmək üçün yenidən imkan əldə edib, 1991-ci ildə Azərbaycan xalqının müstəqillik əldə etmək üçün apardığı mübarizəsi öz məntiqi nöqtəsinə çatıb. Müstəqillik eşqi ilə yaşayan Azərbaycan xalqı ardı kəsilməyən nümayişlərdə iştirak edib, 1990-cı il 20 Yanvar qırğını ilə üz-üzə gəlib. Hətta sovet tankları müstəqilliyə aparan yolun qarşısını ala bilməyib. Yüzlərlə vətənpərvər oğul-qızını qurban verən Azərbaycan yeni həyata qədəm qoyub.
Məqalədə qeyd olunur ki, Azərbaycan Parlamenti 1991-ci il oktyabrın 18-də dövlət müstəqilliyinin bərpa olunması haqqında konstitusiya aktını qəbul edib. Sözügedən sənədə əsasən Azərbaycan Respublikası 1918-ci il mayın 28-dən 1920-ci il aprelin 28-dək mövcud olmuş Azərbaycan Xalq Cümhuriyyətinin varisi elan olunub. Akta əsasən dinindən və etnik mənsubiyyətindən asılı olmayaraq, bütün Azərbaycan vətəndaşlarına bərabər hüquqlar zəmanəti verilib. Vurğulanıb ki, 1991-ci il dekabrın 29-da Azərbaycan Respublikasının Dövlət Müstəqilliyi haqqında konstitusiya aktının dəstəyi barədə ümummilli referendumda xalqın 95 faizi iştirak edib və ölkənin müstəqilliyini yekdilliklə dəstəkləyib. Bundan sonra dünya ölkələri, o cümlədən Birləşmiş Ərəb Əmirlikləri, müstəqilliyini elan etmiş Azərbaycan Respublikasını rəsmən tanıyıb, nəhayət 1992-ci il mayın 2-də Azərbaycan BMT-nin tam hüquqlu üzvü olub. Ümummilli lider Heydər Əliyevin müdrik siyasətinin layiqli davamçısı olan Prezident İlham Əliyevin rəhbərliyi ilə Azərbaycan Respublikasının yüksək templərlə inkişaf etdiyini vurğulayan səfir Daşqın Şikarov qeyd edib ki, təbii sərvətlərlə zəngin olan Azərbaycan enerji resurslarını Avropaya ixrac edir və bu regionun enerji təhlükəsizliyinin təmin olunmasında vacib rol oynayır. Ölkə rəhbərliyinin apardığı düşünülmüş siyasət nəticəsində Azərbaycan Cənub və Şimalı, Şərq və Qərbi birləşdirən nəqliyyat qovşağına çevrilib. Müəllif bildirib ki, Azərbaycan Respublikası Cənubi Qafqaz regionunda nüfuz sahibi, regionda əsas sərmayəçi ölkədir. Prezident İlham Əliyevin qeyri-neft sektorunun inkişafı strategiyası çərçivəsində apardığı islahatlar sayəsində Azərbaycanın sənaye, infrastruktur, kənd təsərrüfatı, idman və turizmin sahələri dinamik inkişaf etdiyi məqalədə vurğulanıb.
Məqalədə Azərbaycanın xarici siyasəti haqqında məlumatlar verilib, ölkənin öz xarici siyasətini ölkə maraqları üzərində qurduğu, Avropa və Asiyanın siyasi sərhədində yerləşərək, hər iki qitənin siyasi strukturlarına inteqrasiya olduğu qeyd edilib, 2012-2013-cü illərdə BMT Təhlükəsizlik Şurasının qeyri-daimi üzvü seçilməsi xüsusi vurğulanıb.
Yazıda yaxın dostluq münasibətində olan Azərbaycan Respublikası və Birləşmiş Ərəb Əmirliklərinin ikitərəfli və çoxtərəfli formatda geniş əməkdaşlıq etdiyi bildirilib, siyasət, diplomatiya, iqtisadiyyat, ticarət, maliyyə, mədəniyyət, ədliyyə və digər sahələrdə imzalanmış sənədlərin ölkələrimiz arasında hüquq-müqavilə bazasını təşkil etdiyi qeyd olunub.
Azərbaycan Respublikası və BƏƏ liderlərinin, həmçinin yüksək səviyyəli dövlət rəsmiləri arasında səfər mübadiləsinin ikitərəfli münasibətlərin inkişafına təkan verdiyini xüsusi qeyd edən müəllif bu təmasların siyasi dialoqu təmin etdiyini və ikitərəfli əməkdaşlığın təşviqinə xidmət göstərdiyini bildirib. Müəllif ölkələrimiz arasında ticarət dövriyyəsinin ildən ilə artığını vurğulayıb. İki ölkənin aparıcı hava daşıyıcıları olan Azərbaycan Hava Yolları, həmçinin BƏƏ-nin “Ettihad”, “Flydubay” və “Air Arabia” hava yolları tərəfindən ölkələrimiz müxtəlif şəhərləri arasında birbaşa hava körpüsü yaratdığını vurğulayıb. Bildirib ki, Azərbaycan və BƏƏ şirkətləri, iş adamlarının müxtəlif beynəlxalq tədbirlərdə qarşılıqlı iştirakı da turizm və ticarət əlaqələrinin güclənməsinə xidmət edir.
Məqalənin tam mətni ilə aşağıdakı keçiddən (5-ci səhifə) tanış olmaq olar.
http://alittihad.newspaperdirect.com/epaper/viewer.aspx
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
