“Expo-2025”də Azərbaycanın enerji sahəsində görülən işlər müsbət qiymətləndirilib
Bakı, 29 sentyabr, AZƏRTAC
Yaponiyanın Osaka şəhərində keçirilən “Expo-2025” dünya sərgisində Azərbaycan heyəti Heydər Əliyev Mərkəzinin təşkilatçılığı ilə qurulan Azərbaycan pavilyonu ilə təmsil olunur. Sentyabrın 28-də “AzərEnerji” ASC-nin nümayəndə heyəti pavilyonda sərginin əsas istiqamətlərindən biri olan BMT-nin 17 Davamlı İnkişaf Məqsədi çərçivəsində görülən işlər barədə təqdimat keçirib.
“AzərEnerji”dən AZƏRTAC-a bildirilib ki, təqdimatda xüsusilə üç istiqamət üzrə görülən tədbirlər vurğulanıb: “Münasib və Təmiz Enerji”, “Məsuliyyətli İstehlak və İstehsal” və “İqlim Dəyişikliyi ilə Mübarizə”. Bu mövzular üzrə Yaşıl Enerji Zonalarının inkişafı, istehsal güclərində yeni texnologiyaların tətbiqi, bərpaolunan enerji mənbələrinin sistemə inteqrasiyası, eləcə də beynəlxalq enerji dəhlizlərində iştirakla bağlı həyata keçirilən layihələr barədə məlumat verilib.
Təqdimat sərgi qonaqları tərəfindən maraqla qarşılanıb və Azərbaycanda enerji sahəsində görülən işlər müsbət qiymətləndirilib.
Bölmənin digər xəbərləri
