Fəlsəfə İnstitutu fəaliyyətini onlayn rejimdə davam etdirir
Bakı, 24 aprel, AZƏRTAC
AMEA-nın prezidenti, akademik Ramiz Mehdiyevin "AMEA əməkdaşlarının 2020-ci il mart ayının 29-dan bir ay müddətinə əməkhaqqı saxlanılmaqla məzuniyyətə göndərilməsi haqqında" imzaladığı sərəncamdan irəli gələrək Fəlsəfə İnstitutunun əməkdaşları fəaliyyətlərini onlayn rejimdə davam etdirirlər.
İnstitutdan AZƏRTAC-a bildirilib ki, karantin müddətində müəssisənin əməkdaşları 2020-ci il üzrə nəzərdə tutulan elmi plana müvafiq olaraq “Fəlsəfə pandemiya dövründə” mövzusunda keçiriləcək elmi seminara, eləcə də görkəmli filosof Ziyəddin Göyüşövün 100 illiyi ilə bağlı keçiriləcək konfransa çıxışlar hazırlayırlar.
İnstitutun direktoru, professor İlham Məmmədzadə “Fəlsəfə müasirlik tarix və mədəniyyət haqqında” kitabının rus dilindən Azərbaycan dilinə tərcüməsi üzərində işləyir. Fəlsəfə İnstitutunun 75 illiyinə həsr olunmuş kitabın giriş hissəsinə fəlsəfə üzrə elmlər doktoru Afaq Rüstəmova tərəfindən “Azərbaycanda fəlsəfənin inkişafı” haqqında məqalə hazırlanıb. Fəlsəfə üzrə elmlər doktoru Aydın Əlizadə tərəfindən isə “Azərbaycanın qazlaşdırılması və qaz təsərrüfatının istismarı (1955-1970) sosioloji araşdırma” adlı kitab üzərində işlər yekunlaşdırılıb.
Bununla yanaşı, əməkdaşlardan Hüseyn İbrahimovun “Xalq” qəzetində pandemiya ilə bağlı məqaləsi nəşr olunub, Zeynəddin Şabanov “Genosid bəşəri cinayət kimi” mövzusunda onlayn seminar keçirib, Anar Qafarov isə Qərbdə İslam tədqiqatları və Hind-Çin fənlərindən onlayn dərslər keçir.
Bölmənin digər xəbərləri
