FHN Dövlət Yanğın Nəzarəti Xidməti inzibati tədbirləri davam etdirir VİDEO
Bakı, 23 iyul, AZƏRTAC
Fövqəladə Hallar Nazirliyinin (FHN) Dövlət Yanğın Nəzarəti Xidməti paytaxtın Yasamal rayonu, Alatava 2 ünvanında yerləşən, avtomobil təmiri, texniki qulluğu və eyni zamanda, mebel istehsalı fəaliyyəti ilə məşğul olan müəssisədə plandankənar yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, aşkarlanmış nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyənləşdirilib.
FHN-in mətbuat xidmətindən AZƏRTAC-a bildiriblər ki, müəssisənin ərazisi, bina və tikililərin yanğına qarşı ara məsafələri tez alışa bilən tullantılardan təmizlənməyib. Tələb olunan sahələrdə avtomatik yanğınxəbərverici siqnalizasiya və yanğınsöndürmə qurğuları, eləcə də elektrik təsərrüfatı “Elektrik Qurğularının Quraşdırılması Qaydaları”nın tələblərinə uyğun quraşdırılmayıb. Propan qaz balonlarından və qeyri-standart elektrik qızdırıcılarından istifadəyə yol verilib. Obyektin tələb olunan zəruri sahələri ilkin yanğınsöndürmə alət və vasitələri ilə təmin olunmayıb, mövcud istismar müddəti başa çatmış odsöndürənlərin tərkibi isə yenisi ilə əvəz edilməyib. Yanğın su hovuzu nasaz vəziyyətdə olmaqla yanaşı, üzərində tikili inşa edilib. İnsanların və qiymətli əşyaların köçürülməsi üçün “Təxliyə planı” tərtib edilməyib.
Hazırkı mövcud vəziyyətdə baş verə biləcək yanğın zamanı faciə qaçılmaz olacaq. İnsanların və avtomobillərin məhdud ərazidə sıx cəmləşməsi, mebel istehsalı sexində xammalın, asan alışan kimyəvi qatqı, lak və boyaların mövcudluğu ilkin yanğınsöndürmə vasitələrinin olmaması səbəbindən vəziyyətə operativ müdaxiləni mümkünsüz edəcək, qısa zaman kəsiyində yanğının geniş sahəyə yayılmasına şərait yaradacaq.
Yanğın təhlükəsizliyi norma və qaydalarının pozulması səbəbindən baş verə biləcək yanğın hadisələrindən insanların həyatının və sağlamlığının, dövlətin əmlak maraqlarının, milli sərvətin, ətraf mühitin, bütün mülkiyyət növlərinin qorunması məqsədilə “Yanğın təhlükəsizliyi haqqında” Azərbaycan Respublikası Qanununun 25-ci maddəsinin 9-cu və “Azərbaycan Respublikası Fövqəladə Hallar Nazirliyi Dövlət Yanğın Nəzarəti Xidməti haqqında Əsasnamə”nin 9.7-ci bəndinin tələblərini rəhbər tutaraq, yanğın təhlükəsizliyi norma və qaydalarının tələblərinin pozulması faktları aşkarlanmış paytaxtın Yasamal rayonunun Alatava 2 ünvanında yerləşən müəssisədə xidmətlərin göstərilməsinin dayandırılması barədə Qərar qəbul edilib.
Bölmənin digər xəbərləri
