FHN-in əməkdaşları Hacıkənd və Göygöl meşələrində yanğın təhlükəsizliyinə qarşı monitorinqlərə başlamışlar
Gəncə, 13 avqust (AZƏRTAC). Fövqəladə Hallar Nazirliyinin (FHN) Gəncə Regional Dövlət Yanğın Nəzarəti İdarəsi yanğın təhlükəsizliyi qaydalarına əməl olunmasının vəziyyətini öyrənmək və bu sahədə maarifləndirmə işlərini genişləndirmək məqsədilə monitorinqlərə başlamışdır.
AZƏRTAC xəbər verir ki, yoxlamalara Hacıkənd və Göygöl meşələrindən başlayan idarə əməkdaşları burada fəaliyyət göstərən ictimai iaşə obyektlərində vəziyyətlə yaxından tanış olmuşlar. Yoxlamalar zamanı məlum olmuşdur ki, bəzi yerlərdə yanğın təhlükəsizliyi qaydalarına düzgün əməl edilmir. Xüsusilə ilkin yanğınsöndürmə balonlarının təyinata uyğun istifadə edilməməsi, qadağan olunmuş yerlərdə tonqal qalanması narahatlıq yaratmış və həmin obyekt sahiblərinə ciddi xəbərdarlıq edilmişdir.
Monitorinq zamanı meşə massivlərində fəaliyyət göstərən çörəkbişirmə məntəqələri, çayxana və digər ictimai-iaşə obyektlərinin sahibləri ilə maarifləndirici söhbətlər aparılmışdır.
Bölmənin digər xəbərləri
