COP29
Filippinli deputat: Həssas icmalar üçün iqlim maliyyəsində irəliləyişə ümid edirik
Bakı, 22 noyabr, AZƏRTAC
Biz oxşar düşüncəli qanunvericilərlə dialoq qurub əlaqələr yaratmaq imkanı əldə etdiyimiz üçün minnətdarıq. İnanırıq ki, bu sahədə, xüsusilə də ikitərəfli əməkdaşlıq sahəsində daha çox irəliləyiş əldə edəcəyik.
Bunu Filippin Parlamentinin Nümayəndələr Palatasının üzvü, deputat Anna Viktoriya Tuazon AZƏRTAC-a açıqlamasında deyib.
Qlobal iqlim dəyişikliyi ilə mübarizədə maliyyə mexanizmlərinin vacibliyini vurğulayan filippinli deputat əlavə edib: “Maliyyə məsələlərində irəliləyişin əldə olunacağına ümid edirik. Çünki itkilər və zərərlər trilyonlarla ölçülür və ehtiyacın böyüklüyünü nəzərə alaraq, bu sahəni genişləndirmək və daha çox konkret işlər görmək niyyətindəyik. Xüsusilə Filippindəki kimi həssas icmalar üçün”.
A.V.Tuazon Filippindəki əsas iqlim problemləri haqqında da danışıb: “Biz son bir ay ərzində ölkəmizdə dörd tayfunun baş verdiyini gördük. Daha şiddətli fırtınalar tez-tez baş verir. Bu da onu göstərir ki, biz artıq adaptasiya və yumşaltma mərhələsini keçmişik. İndi uzunmüddətli planlaşdırma mərhələsinə keçməliyik və bunu, xüsusilə itki və zərər maliyyəsi vasitəsilə həyata keçirməyə ümid edirik”.
Azərbaycan və COP29 tədbirin təşkilatçılığı barədə təəssüratlarını bölüşən Anna Viktoriya Tuazon Bakını "xoş sürpriz" adlandırıb: “Azərbaycana ilk səfərimdir və çox təsirləndim. Köhnə şəhəri görmək, həm müasir, həm də qədim elementlərin ahəngini izləmək, bu irsi necə qoruduğunuzu görmək çox təsirli idi. Tədbir çox səmərəli təşkil olunub”.
Bölmənin digər xəbərləri
