Florida ştatında binanın uçması nəticəsində ölənlərin sayı 97-yə çatıb
Bakı, 15 iyul, AZƏRTAC
ABŞ-ın Florida ştatının Serfsayd şəhərində 12 mərtəbəli binanın uçması nəticəsində ölənlərin sayı 97 nəfərə çatıb.
AZƏRTAC ABŞ KİV-lərinə istinadla xəbər verir ki, yerli hakimiyyət orqanları dağıntılar altından daha iki cəsədin çıxarılması barədə məlumatı təsdiqləyib. Mayami-Deyd dairəsinin meri Daniella Levin Kava 90 cəsədin şəxsiyyətinin müəyyən olunduğunu bildirib.
Qeyd edək ki, iyunun 24-nə keçən gecə Florida ştatının Mayami-Deyd dairəsində yerləşən Serfsayd şəhərində çoxmərtəbəli yaşayış binası uçub. Hakimiyyət orqanları binada olan 130 mənzilin yarısının dağıldığını bildirib. İtkin düşənlərin arasında azı doqquz dövlətin - ABŞ, İsrail, Rusiya və Latın Amerikasının 6 ölkəsinin vətəndaşları var.
Xilasedicilər sağ qalma şansı olmadığı üçün iyulun 8-də axtarış-xilasetmə əməliyyatını dayandırıb.
Bölmənin digər xəbərləri
