Fövqəladə Hallar Nazirliyinin Xüsusi Riskli Xilasetmə Xidməti xüsusi-taktiki təlim keçirmişdir
Bakı, 6 noyabr (AZƏRTAC). Paytaxtın Nardaran qəsəbəsində yerləşən pansionatda Fövqəladə Hallar Nazirliyinin Xüsusi Riskli Xilasetmə Xidmətinin xilasetmə qüvvələri xüsusi-taktiki təlim keçirmişlər.
Təlimdə Xidmətin Xüsusi Riskli Xilasetmə və Mühafizə Alayı, Kinoloji Tabor, Çevik Xilasetmə İdarəsi və digər xilasetmə qüvvələri iştirak etmişlər.
Təlimin keçirilməsində məqsəd ölkə ərazisində baş verə biləcək dağıntıların nəticələrinin aradan qaldırılmasına çevik reaksiya verilməsini və partlayışlar nəticəsində dağıntılara məruz qalmış ərazilərdə xüsusi riskli xilasetmə işlərinin təşkili, zərərçəkmişlərə ilk yardım və təxirəsalınmaz tibbi yardımın göstərilməsi, axtarış-xilasetmə işlərində tətbiq olunan alət və avadanlıqlardan istifadə, xilasetmə əməliyyatlarında texniki təhlükəsizlik tədbirlərinə riayət olunmasını təmin etmək üçün praktiki vərdişlərin artırılması olmuşdur.
Ssenariyə əsasən pansionatın inzibati binasında yanğın və dağıntılarla müşayiət olunan partlayışlar baş vermişdir. Ətrafda olan kiçik yaşayış binaları dağılmışdır. Xilasetmə qüvvələri hazırlıq vəziyyətinə gətirildikdən sonra dərhal hadisə yerinə yollanmışlar. Hadisə yerində əməliyyat şəraiti qiymətləndirilmiş və texniki-təhlükəsizlik qaydalarına tam riayət olunmaqla axtarış-xilasetmə əməliyyatlarına başlanılmışdır. Xilasetmə və mühafizə qrupları zərərçəkmişləri təhlükəli ərazidən uzaqlaşdırmış, ərazi mühafizəyə alınmış, giriş-çıxışlar məhdudlaşdırılmışdır. Baş verən yanğınlar söndürülmüş, dağıntılar altında qalmış cəsədlər çıxarılmış, zərərçəkmişlər təxliyə edilərək onlara ilk tibbi yardım göstərilmişdir.
Bundan əlavə, pansionatın ərazisində yerləşən köməkçi binalardan birində partlayış təhlükəli əşya aşkar olunmuş və xidmətin pirotexnik və istehkam qrupu tərəfindən su topu vasitəsilə zərərsizləşdirilmişdir. Baş vermiş fövqəladə hal zamanı xüsusi təlim görmüş itlərdən, pirotexnik qruplardan, xilasetmə alət və avadanlıqlarından geniş istifadə olunmuşdur. Dağıntılar altından şərti olaraq dörd cəsəd çıxarılmış, 12 nəfər zərərçəkmişə ilk tibbi yardım göstərilmiş, 21 nəfər təxliyə olunmuş və bir ədəd partlayış təhlükəli əşya aşkar olunaraq zərərsizləşdirilmişdir.
Ümumilikdə təlimə Xüsusi Riskli Xilasetmə Xidmətinin 140 əməkdaşı və 17 texnikası cəlb olunmuşdur.
Bölmənin digər xəbərləri
