Fransa həbsxanalarında məhbusların sayı rekord səviyyəyə çatıb
Bakı, 1 avqust, AZƏRTAC
Fransa həbsxanalarında məhbusların sayı ötən il 2020-ci ilin yayından bəri 15 min 818 nəfər artaraq rekord səviyyəyə çatıb.
AZƏRTAC xarici KİV-ə istinadla xəbər verir ki, Fransada dustaqların sayı ötən apreldə ilk dəfə olaraq 73 mini keçib. Hazırda həbsxanalarının doluluq səviyyəsi 122,8 faizə, təcridxanaların doluluğu isə 146,3 faizə yüksəlib.
Avropa İnsan Haqları Məhkəməsi 2020-ci ildə cəzaçəkmə müəssisələrində hədsiz sıxlığa görə Fransanın ədliyyə sistemini tənqid edib və “fundamental hüquqları ciddi şəkildə pozulan” 32 məhbusa 25 min avro təzminat ödənilməsi barədə qərar çıxarıb.
Fransa parlamenti isə öz növbəsində həbsxanalarda tənzimləmə mexanizmlərinə təcili ehtiyac yarandığına dair hesabat dərc edib.
Eyni zamanda, “Observatoire International des Prisons” dustaqları müdafiə qrupu hesab edir ki, Fransa hakimiyyətinin 2024-cü ildə Parisdə keçiriləcək Olimpiya Oyunları ilə bağlı “sıfır cinayət” siyasəti nəticəsində həbsxanalarda sıxlıqla bağlı vəziyyət daha da ağırlaşacaq.
Bölmənin digər xəbərləri
